Qazaqstanda ákimdikterdiń ashyqtyǵy jobasy engiziledi

NUR-SULTAN. QazAqparat – QR Aqparat jáne qoǵamdyq damý mınıstri Dáýren Abaevtyń tóraǵalyǵymen elordada Aqparatqa qol jetkizý máseleleri jónindegi Komıssııanyń qorytyndy otyrysy ótti, dep habarlaıdy QazAqparat tilshisi.

Komıssııa otyrysynda data-jýrnalıstıkany damytý perspektıvalary, jergilikti atqarýshy organdardyń ashyqtyǵynyń etalondyq úlgisi, memlekettik organdardyń aqparattyq júıeleriniń derekterin taldaý nátıjesi jáne qujat aınalymyn azaıtý sharalary talqylandy.

«Rýhanı Jańǵyrý» Qazaqstannyń qoǵamdyq damý ınstıtýty QEAQ Basqarma Tóraǵasy Kemelbek Oıshybaev óz baıandamasynda jergilikti atqarý organdary ashyqtyǵynyń tıptik modeli ázirlengenin jáne ol 17 óńir ákimdikteriniń ókilderine tanystyrylǵanyn aıtty. Atalǵan tıptik model 7 baǵyttan turady: 1 qadam – aqparat jınaqtaý, 2 qadam – problemany aıqyndaý, 3 qadam –daıyndaý protsesi, 4 qadam – sheshim, 5 qadam – azamattyq qoǵam ókilderimen kelisý, 6 qadam – oryndaý jáne monıtorıng, 7 qadam – baǵalaý.

«Tıptik modeldiń negizgi maqsaty men mindetteri – jańa ashyqtyq úlgisin jasaý. Sol arqyly ákimdikterdiń ashyqtyǵyn arttyryp, halyqtyń muń-muqtajyna jedel jaýap qatý, azamattardyń aryz-shaǵymyn qaraý sapasyn arttyrý, qoǵamdyq dıalog júrgizý kózdelgen. Ashyqtyq modelin engizý Prezıdent aıtqan Halyq únine qulaq asatyn memleket ıdeıasyn júzege asyrýǵa múmkindik beredi», - dedi Kemelbek Oıshybaev.

Onyń aıtýynsha, Almaty men Shyǵys Qazaqstan oblystarynyń ákimdikterinde ashyqtyqty qamtamasyz etý tájirıbeleri zerttelgen.

Sonymen birge, komıssııa otyrsynda «Zerde» UAH» AQ Ashyq úkimet jáne derekter departamentiniń dırektory G.D. Abdyǵalıeva memlekettik organdardyń aqparattyq júıeleriniń derekterin taldaý týraly, PMK Baqylaý jáne qujattamalyq qamtamasyz etý bólimi meńgerýshisiniń orynbasary B.A. Tileýov, MSM, BǴM, EHÁQM ókilderi Qujat aınalymdy qysqartý boıynsha memlekettik organdarmen iske asyrylǵan sharalar týraly bıaandama jasady.

Otyrys sońynda Komıssııanyń 2020 jylǵy jumysynyń jospary tanystyryldy.