Qazaqstanda ákimderdi saılaý naýqany árbir óńirde bir aı boıy ótedi - OSK
Bul týraly búgin Ortalyq saılaý komıssııasynda ótken brıfıng barysynda vedomstvonyń baspasóz hatshysy Venera Jeksembekova málim etti.
«Byltyrǵy jyldyń jeltoqsanynda Memleket basshysy N. Nazarbaev «Qazaqstan-2050» Strategııasy jarııalanǵan Joldaýynda máslıhat arqyly aýdandyq mańyzy bar qala jáne aýyl ákimderin saılaý týraly máseleni júktegen bolatyn. Qoǵamdyq baqylaýdy jáne jergilikti jerlerdegi ahýalǵa azamattardyń yqpalyn kúsheıtý maqsatynda Prezıdent N. Nazarbaev 2013 jylǵy qyrkúıekten keshiktirmeı elimizde tıisti máslıhattar arqyly aýdandyq mańyzy bar qalalar, aýyl ákimderin, aýyldyq okrýgter quramyna enbeıtin kentter ákimderin saılaý týraly sheshim qabyldandy», - deıdi V. Jeksembekova.
Onyń aıtýynsha, osy maqsatta saılaýdy ótkizý tártibi anyqtalyp, Ortalyq saılaý komıssııasy arnaıy is-sharalar josparyn bekitken. Soǵan sáıkes, aýyl ákimderiniń saılaýyn uıymdastyrýǵa jáne ótkizýge quramynda 1 myń 316 múshesi bar 14 oblystyq, 28 qalalyq jáne 160 aýdandyq aýmaqtyq saılaý komıssııalary tartylatyn bolady.
«Saılaý naýqany saılaý taǵaıyndalǵannan bastap, onyń qorytyndylary anyqtalǵanǵa deıin árbir óńirde bir aı boıy ótedi», - dedi baspasóz hatshysy.