Qazaqstanda AITV ınfektsııasyn juqtyrǵandardy kemsitýshilik áli bar

NUR-SULTAN. QazAqparat - Búgin Jer sharynda Birikken Ulttar Uıymynyń bastamasymen Kemsitýshilikpen kúres kúni atalyp ótilýde. Uıymnyń osy jylǵy urany – «Zııan keltiretin zańdardy joıý. Múmkindikterdi keńeıtetin zańdar qabyldaý», dep habarlaıdy QazAqparat tilshisi.

Adam ımmýnıteti tapshylyǵy vırýsyna (AITV) baılanysty qandaı da bir kemsitýshilikke jol bermeý týraly memlekettiń kepildikteri elimizdiń Konstıtýtsııasynda jáne «Halyq densaýlyǵy týraly» kodekste zańnamalyq deńgeıde bekitilgen. Elimizde ıÝNEIDS 95-95-95 strategııasy da iske asyrylyp jatyr. Ol AITV ınfektsııasyna baılanysty aldyn alýdy, testileýdi, emdeýdi jáne kútimdi qamtamasyz etýge baǵyttalǵan.

Búginde Nur-Sultan qalasynda AITV-men ómir súretin adamdardyń 92 paıyzy ózderiniń mártebesin biledi. Olardyń 77 paıyzy antıretrovırýstyq terapııany (ART) qabyldaıdy. AITV-men ómir súretin adamdardyń 87 paıyzynda vırýstyq júkteme basyńqy.

«Ókinishke oraı kemsitýshiliktiń kez kelgen túrin áli de kezdestiremiz. Osy kemsitýshilik joıylǵan jaǵdaıda AITV ınfektsııasy epıdemııasynyń ósý qarqyny edáýir azaıar edi. Sol sebepti de aıtýly datalardyń paıdasy kóp. Biz stıgmaǵa barynsha kóńil bóle otyryp, AITV-men ómir súretin adamdardyń múmkindigin arttyramyz, olardyń em ala otyryp, ómir súrý sapasy men uzaqtyǵyn jaqsartýǵa septigimizdi tıgizemiz», - deıdi Nur-Sultan qalalyq JITS ortalyǵy dırektorynyń orynbasary Saltanat Mýsına.

Saltanat Mýsınanyń aıtýynsha, AITV-men ómir súretin adamdarǵa jan-jaqty qoldaý kórsetý olardyń ómirge degen senimdiligin týǵyzady. Osy baǵytta qalalyq JITS ortalyǵy 2021-2023 jyldarǵa arnalǵan AITV komponenti boıynsha Jahandyq qordyń grantyn aldy. Grant aıasynda aldyn alý qyzmetterin, sondaı-aq AITV-men ómir súretin adamdarǵa kútim men qoldaý kórsetetin 3 úkimettik emes uıymmen jumys júrgiziledi.