Qazaqstanda Airbus ushaqtaryna qyzmet kórsetetin servıs ortalyǵy ashylady

NUR-SULTAN. QazAqparat - 2022 jyly elimizdiń qorǵanys ónerkásibinde birqatar perspektıvalyq jobalardy iske asyrylady, dep habarlaıdy QazAqparat.

Otandyq qorǵanys ónerkásibiniń basty mindetteriniń biri - kásiporyndardyń tehnologııalyq ınfraqurylymy men kadr áleýetin damytý.

Bul elimizdiń Qarýly Kúshterin, basqa da áskerler men áskerı qurylymdardy qazirgi zamanǵa saı qarý-jaraq pen áskerı tehnıkamen qamtamasyz etý mindetin oryndaýǵa múmkindik beredi.

Bıyl elimizdiń qorǵanys ónerkásibi kásiporyndary birqatar perspektıvalyq jobalardy iske asyrýdy josparlap otyr.

Atap aıtqanda, «№ 405 avıajóndeý zaýyty» AQ bazasynda Mı-171Sh tikushaqtaryn qurastyrý, «Qazaqstandyq avıatsııalyq ındýstrııa» JShS kásipornynda Airbus ushaqtaryna qyzmet kórsetetin servıs ortalyq ashý; «Petropavl aýyr mashına jasaý zaýyty» AQ bazasynda memlekettik shekarany qorǵaýdyń tehnıkalyq quraldaryn óndirý, «Tynys» AQ, «Alma MÚ» JShS, «Mılıtarm» JShS kásiporyndarynda radıatsııalyq jáne hımııalyq qorǵaý quraldary óndirisin jolǵa qoıý josparlanǵan.

Sonymen qatar, «Semeı ınjınırıng» AQ bazasynda bronetanktik tehnıkany jańǵyrtý; «Steelmanufacturing» JShS avtomatty oq-dáriler óndirý, «Qazaqstan Paramaýnt ınjınırıng» JShS-de «Barys 8h8» saýytty dóńgelekti mashınalar óndirisin, «Tynys»AQ bazasynda AK-12 jáne AK-15 avtomattary óndirisin iske qosý kózdelip otyr.

Jalpy alǵanda, elimizdiń qorǵanys-ónerkásip kesheni qalyptasý jolynan ótip, búgingi tańda áskerı salany ǵana emes, azamattyq sektordy da túrli ónimdermen qamtamasyz etip keledi.