Qazaqstanda AI-92 benzıni 13 kúnge jetedi

ASTANA. QazAqparat - Qazaqstanda 13 kúnge jetetin AI-92 benzıni bar. Bul týraly búgin Úkimettiń selektorlyq rejimdegi otyrysynda QR Energetıka mınıstri Qanat Bozymbaev aıtty, dep habarlaıdy QazAqparat.

«Qabyldanǵan sharalardyń arqasynda elimizde keshegi kúni AI-92 benzıniniń jıyntyq qaldyǵy 127 myń tonnany qurady. Bul  birneshe kún burynǵy kólemnen 10 myń tonnaǵa artyq nemese qalǵan benzın mólsheri 13 kún boıy qamtamasyz etýge jetedi. Bul eldiń barlyq óńirlerin satylymda qandaı da bir irkilissiz tolyqtaı qamtamasyz etýge jetetin qaldyq deńgeıi», - dedi Bozymbaev.

Onyń atap ótýinshe, qazirgi kúni AI-92 benzınin satýda shekteý bar óńirler joq deýge de bolady. Degenmen, janarmaı satatyn 2 jelide AI-92 benzınin talonmen satý júrgizilýde.

«Menińshe, bul jeliler de taıaý birneshe kúnniń ishinde erkin satýǵa kóshetin bolady. Buǵan qosa, ótken aptada mınıstrliktiń komıssııasyn munaı óńdeý zaýyttaryn jańǵyrtý jumystaryna aýdıt júrgizý úshin jiberdim. Pavlodar munaı óńdeý zaýyty boıynsha barlyq jumystar kestege sáıkes júrgizilýde, zaýyttyń iske qosylýy 26 qazanǵa josparlanǵan. Qazan aıynyń sońyna deıin zaýyt 65 myń tonna munaı óńdep, táýligine AI-92 benzıniniń 2,5 myń tonnasyn jóneltip otyrady dep josparlanýda. Osylaısha, biz osy aptada ahýal tolyqtaı turaqtalady dep otyrmyz. Buǵan qosa, apta sońynda 50 myń tonna ımport benzın kiredi jáne kelesi aptada qazaqstandyq benzındi barynsha óndirý qolǵa alynady», - dedi mınıstr.