Qazaqstanda AES-ti salýǵa laıyqty oryndar retinde ShQO men Balqash qarastyrylýda
Bul týraly búgin Ortalyq kommýnıkatsııalar qyzmetindegi brıfıngte QR Energetıka mınıstrligi Atom jáne energetıkalyq baqylaý men qadaǵalaý komıteti tóraǵasynyń orynbasary Tımýr Jantıkın málim etti.
«Qazirgi kezde AES-tiń qurylysy boıynsha eki jer qarastyrylyp otyr, ıaǵnı bul turǵyda Shyǵys Qazaqstan, sondaı-aq Balqash JES alańynda ornalastyrý eskerilgen. Bul burynǵy Ońtústik Qazaqstan memlekettik óńirlik elektr stansasynyń alańy. Qazirgi kezde ol jerde JES salynyp jatyr»,-dedi T. Jantıkın.
Bastapqyda saraptamalyq top AES-ti ornalastyrýdyń birneshe nusqasyn qarastyryp, osydan keıin úkimettik komıssııada stansanyń qurylysyna 3 alań irikteldi. Atap aıtqanda, Aqtaý, Balqash jáne Shyǵys Qazaqstan óńirine ekpin qoıyldy.
«Qazirgi kezde Aqtaý bul tizimnen shyǵaryldy, endi eki alań qaldy. Búginde naqty sheshim qabyldanǵan joq»,-dep túıdi ol.