Qazaqstanda AES salý boıynsha jarııa talqylaý Qaraǵandy qalasynda ótedi

<p>ASTANA. KAZINFORM &ndash; 5 shilde kúni Qaraǵandy qalasynda Qazaqstanda AES salý boıynsha jarııa talqylaý ótpekshi. Bul týraly oblys ákimdiginiń baspasóz qyzmeti málimdedi.</p>

2023 jylǵy 1 qyrkúıektegi «Ádil Qazaqstannyń ekonomıkalyq baǵyty» atty Qazaqstan halqyna Joldaýynda Memleket basshysy Qazaqstanda atom elektr stantsııalaryn salý máselesi boıynsha jalpyulttyq referendým ótkizýge bastamashy bolǵan.

Sonymen qatar, Joldaýda Qazaqstan Respýblıkasynyń Prezıdenti referendým ótkizý merzimderi keıinirek belgilenetinin atap ótti. Referendým ótkizý tártibi 1995 jylǵy 2 qarashadaǵy «Respýblıkalyq referendým týraly» Qazaqstan Respýblıkasynyń Konstıtýtsııalyq zańymen reglamenttelgen.

Qazaqstanda AES salý máselesin talqylaý maqsatynda referendým ótkizilgenge deıin Qaraǵandy oblasynda jarııa talqylaýlar ótkizý josparlanyp otyr.

Jarııa talqylaýǵa atom salasynyń salalyq sarapshylary qatysady. Jarııa talqylaýlardy ótkizý barysynda azamattar ózderin qyzyqtyratyn tehnologııalardyń qaýipsizdigi boıynsha da, AES qurylysynyń áleýmettik-ekonomıkalyq aspektileri boıynsha da kez kelgen suraqtaryn qoıa alady.

Jarııa talqylaý ótkiziletin orny: Qaraǵandy q., «Qoǵamdyq kelisim» KMM, Kenshiler dańǵyly, 64.

Jarııa talqylaýdy ótkizý kúni men ýaqyty: 2024 jylǵy 5 shilde saǵat 15.00-de.

Budan buryn habarlanǵandaı, Prezıdent Qasym-Jomart Toqaev BAQ salasy qyzmetkerlerin marapattaý rásiminde sóılegen sózinde elde atom elektr stansasyn salý jobasy týraly pikir bildirdi. Atap aıtqanda, AES jónindegi referendým kúzde ótedi. 

Sondaı-aq, Senat tóraǵasy Máýlen Áshimbaev  AES qurylysynda Qazaqstan halqy ózi tańdaý jasaıtynyn habarlaǵan bolatyn.

Al, Májilis depýtaty Aıdos Sarym AES salý referendýmynda sanaly tańdaý jasaýǵa múmkindik alatynymyzdy aıtqan edi.