Qazaqstanda advokat qyzmetine tólem jasaýdyń tarıftik kestesi ázirlenedi

ASTANA. QazAqparat - Qazaqstanda advokattar qyzmetine tólem jasaýdyń tarıftik kestesi ázirlenedi. Bul týraly búgin elordada ótip jatqan «Qazaqstan Respýblıkasyndaǵy zańgerlik kásipti retteýdiń ózekti máseleleri» taqyrybyndaǵy halyqaralyq konferentsııada QR Ádilet mınıstrligi Tirkeý qyzmeti jáne zańgerlik qyzmetterdi uıymdastyrý departamentiniń dırektory Bahtygúl Ataqazıeva aıtty, dep habarlaıdy QazAqparat.

«Halyqty qulaqtandyrý jáne ádil baǵany belgileý úshin advokattardyń kómegine tólem jasaýdyń tarıftik kestesin ázirleý qarastyrylý ústinde. Usynylyp otyrǵan tarıftiń arqasynda azamattar zańgerlik kómektiń belgili bir ortasha baǵasyn bilýge múmkindik  alyp jáne onyń negizsiz eselenýinen qutylady», - dedi ol.

Ataqazıevanyń atap ótýinshe, kórsetiletin zańgerlik kómekke arnalǵan tarıftik kesteni ázirleý jáne ony bekitýmen respýblıkalyq advokattar alqasy aınalysady. Tarıftik keste usynys sıpatyna ıe jáne kez kelgen adamǵa qoljetimdi bolady.

Aıta keteıik, elordada «Qazaqstan Respýblıkasyndaǵy zańgerlik kásipti retteýdiń ózekti máseleleri» taqyrybynda halyqaralyq konferentsııa ótýde. Shara barysynda qatysýshylar elimizdiń Ádilet mınıstrligi ázirlegen «Advokattyq qyzmet jáne zańgerlik kómek týraly», «Advokattyq qyzmet jáne zańgerlik kómek máseleleri boıynsha keıbir zańnamalyq aktilerge ózgerister men tolyqtyrýlar engizý týraly» zań jobalaryn talqylaýda.