Qazaqstanda ádep kodeksiniń jańa jobasy ázirlendi

NUR-SULTAN. QazAqparat – Elimizde memlekettik qyzmetshilerge arnalǵan ádep kodeksiniń jańa jobasy daıyndaldy. Bul týraly QR Memlekettik qyzmet isteri agenttiginiń tóraǵasy Darhan Jazyqbaev málim etti, dep habarlaıdy QazAqparat tilshisi.

«Agenttik memlekettik qyzmetshilerdiń eńbek quqyqtarynyń saqtalýy boıynsha monıtorıng júrgizý jumysyn jalǵastyrýda. Memlekettik qyzmetshilerdiń quqyqtaryn qorǵaý maqsatynda «E-qyzmet» júıesin ıntegratsııalaý jumysy júrip jatyr. Ázirshe 119 ıntegratsııa júzege asyryldy. Agenttiktiń bastamasyna saı aýmaqtyq departamentter men eńbek ınspektsııasy jónindegi óńirlik basqarmalardyń arasynda ózara yntymaqtastyq týraly memorandým jasaldy», - dedi Darhan Jazyqbaev agenttiginiń keńeıtilgen alqa otyrysynda.

Agenttiń basshysynyń aıtýynsha, memlekettik qyzmetshilerdiń eńbek quqyǵyn buzý boıynsha 93 materıal qaralyp, nátıjesinde 65 qyzmetshige qosymsha demalys berildi. Jáne atalǵan olqylyqqa jol bergen 2 basshy ákimshilik jaýapkershilikke tartyldy.

«Memlekettik qyzmet salasyna qatysty normatıvtik-quqyqtyq bazany jetildirýge qatysty agenttikke usynystar berýdi qolǵa alý qaralýda. Memlekettik baqylaýdy júzege asyrý, memlekettik qyzmetshilerdiń ádebi máseleleri boıynsha zańnamany jetildirý maqsatynda ádep kodeksi úlgisiniń jańa jobasy ázirlendi. Onda adamǵa baǵdarlanǵan memlekettik apparat qalyptastyrý, memlekettik qyzmet kórsetýdegi ashyqtyq qaǵıdasynyń saqtalýyna basymdyq berilgen», - deıdi ol.