Qazaqstanda ádebı agent júıesin qurý kerek - Smaǵul Elýbaı

ALMATY. QazAqparat - Qazaqstanda ádebı aýdarma sátti jolǵa qoıylýy úshin eń aldymen ádebı agent júıesin iske qosý kerek. Bul týraly jazýshy Smaǵul Elýbaı Halyqaralyq jazýshylar forýmynda aıtty, dep habarlaıdy QazAqparat tilshisi.

Belgili jazýshy Smaǵul Elýbaıdyń aıtýynsha, aýdarmashy avtordyń obalyna qalmaýy kerek. Ol úshin ádebı agent júıesin iske qosý qajet. Qazirgi zamanda onsyz ádebıettiń mańdaıy jaryq bola qoımaıdy. Ádebı shyǵarmanyń ózge tilge aýdarylýy óte kúrdeli problema.

«Meniń «Aqboz úı» romanym ıspan tiline aýdaryldy. Oǵan bárimiz qýandyq. Keıin sol eldiń shyǵarmashylyq adammymen kezdesip, kitapty kórsettim. Sonda ol maǵan «óte nashar aýdarma» dedi. Qýanyshym sý sepkendeı basyldy. Onymen kim aınalysqanyn bilmedim. Aty-jóninen de, qandaı shyǵarmalar aýdarǵanynan da habarsyzbyn. Árbir elde ádebı agent degen bolady. Olar bárin qadaǵalap otyrady: kitapty qalaı taratý kerek, qaı baspadan shyǵarý kerek, qaı aýdarmashyǵa berý kerek. Osynyń bárin óz moınyna alady»,- deıdi Smaǵul Elýbaı.

Onyń aıtýynsha, damyǵan elderdiń bárinde jazýshy men baspa arasyndaǵy dáneker rólin agentter atqarady. Jazýshylar úıinde otyryp jazýmen ǵana aınalysady.

«Muny aıtyp otyrǵan sebebim – aýdarmany da qadaǵalaıtyn sol ádebı agentter. Ózine paıda túsetin bolǵandyqtan avtormen birdeı jany ashıdy, tabanynan taýsylǵansha júgiredi.Sol júıeni qolǵa almaıynsha aýdarma isine kúmánmen qarap otyra beremiz»,- dedi jazýshy.

Buǵan deıin, Memleket jáne qoǵam qaıratkeri Oljas Súleımenov,qazaq jazýshylarynyń shyǵarmalaryn úzdik mamandar aýdarý kerektigin aıtqan bolatyn.

Eske sala ketsek, Almatyda halyqaralyq jazýshylar forýmy ótip jatyr. Oǵan 18 memleketten 81 delegat qatysýda.