Qazaqstanda adam saýdasyna qarsy is-qımyl týraly zań jobasy ázirlenip jatyr
«Qazirgi kezde adam saýdasymen kúres baǵytyndaǵy qylmystardy anyqtaý men tergeý boıynsha tıisti tájirıbeni jınaqtadyq. Buǵan memlekettik organdar men azamattyq sektor arasyndaǵy dıalog alańy yqpal etti. Osy oraıda adam saýdasymen kúres boıynsha vedomstvoaralyq komıssııa túrindegi alań qyzmet etip otyr. Osy tektes óńirlik komıssııalar oblystar men qalalar ákimdikteri janynda jumys istep jatyr», - dedi Q. Nurmaǵambetov Ortalyq kommýnıkatsııalar qyzmetindegi dóńgelek ústel otyrysynda.
Onyń aıtýynsha, ár úsh jyl saıyn tıisti is-sharalar keshenin qamtıtyn úkimettik jospar qabyldanady. Qazirgi kezde 2021-2023 jyldarǵa arnalǵan jospar oryndalyp jatyr.
«Ony júzege asyrýǵa memlekettik ári jergilikti atqarýshy organdar, halyqaralyq jáne úkimettik emes uıymdar qamtylǵan. Zardap shekken adamdardyń quqyǵy men múddesin qorǵaý, olarǵa kómek kórsetý turǵysynda elimizde 20-dan astam úkimettik emes uıym qyzmet etip jatyr», - dedi vedomstvo ókili.
Budan bólek ol bul saladaǵy negizgi baǵyt retinde Qazaqstanda adam saýdasyna qarsy is-qımyl týraly zań jobasynyń ázirlenýiniń mańyzdylyǵyn aıtty.
«Qazirgi kezde erejelerdiń kóbisi adam quqyqtary salasyndaǵy jáne adam saýdasymen kúres baǵytyndaǵy halyqaralyq konventsııada ratıfıkatsııalanǵan. Degenmen elde jeke zań qabyldanbaǵan. Zań jobasy adam quqyqtary turǵysynda Qazaqstan Prezıdentiniń tapsyrmasyn oryndaý baǵytynda daıarlanyp jatyr. Qujattyń tujyrymdamasyn ázirleý merziminde 2022 jyldyń qyrkúıegi, al zań jobasyn daıarlaýda 2023 jyldyń sáýiri belgilengen», - dedi Qanat Nurmaǵambetov.
Budan buryn habarlanǵandaı, QR Іshki ister mınıstrligi Uıymdasqan qylmysqa qarsy kúres departamenti basshysynyń mindetin atqarýshy elimizde adam saýdasyna qatysty qandaı qylmystar anyqtalyp jatqanyn aıtty.