Qazaqstanda «Abaı» jáne «Ál-Farabı» telearnalary ashylady

NUR-SULTAN. QazAqparat – Bıyl «Abaı TV» jáne «Ál-Farabı» eki jańa telearna ashylady. Bul telearnalar mádenıettiń baılyǵy men murasyna arnalǵan jańa bilim berý-aǵartýshylyq televızııalyq joba bolmaq. Bul týraly Aqparat jáne qoǵamdyq damý mınıstri Aıda Balaeva málim etti, dep habarlaıdy QazAqparat tilshisi.

«Mınıstrlik tarapynan otandyq aqparat keńestiginiń básekege qabilettiligin arttyrý men damytý boıynsha dáıekti jumys júrgizilýde. Qazirgi kezde Qazaqstanda jańa eki, ıaǵnı «Abaı TV», «ál-Farabı» telearnalaryn ashý máselesi qarastyrylyp jatyr», - dedi mınıstr Ortalyq kommýnıkatsııalar qyzmetinde onlaın rejımde ótken halyqqa esep berý kezdesýi barysynda.

Onyń sózine qaraǵanda, «Abaı TV» telearnasy erteń - 30 maýsymnan jumysyn bastaıdy. Ol «Qazaqstan» TRK» quramyna kiredi jáne otandyq mádenıet murasyn nasıhattaıtyn arna bolady.

Ekinshi telejoba - «Ál-Farabı» telearnasy. Ol «Habar» telearnasynyń bazasynda jańa oqý jylynyń qarsańynda kórsetile bastaıdy. «Ál-Farabı» telearnasy oqý-aǵartý televızııalyq platforma bolady jáne 6-18 jasqa deıingi balalar men jasóspirimderge arnalady.