Qazaqstanda 90 myńǵa jýyq memlekettik qyzmetshi bar

NUR-SULTAN. QazAqparat – Qazirgi tańda memlekettik qyzmetshilerdiń naqty sany 89 005 adamdy quraıdy. Bul týraly QazAqparat Memlekettik qyzmet isteri agenttigine silteme jasap habarlaıdy.

«Qazirgi tańda memlekettik qyzmetshilerdiń naqty sany 89 005 adamdy quraıdy. Onyń ishinde 49 584 áıelder (55,7%), sondaı-aq 9 521-i basshylyq laýazymdardaǵy áıelder (elimizdegi basshylyq laýazymnyń 40%-y) quraıdy. Memlekettik qyzmet salasynyń zańnamasyn únemi jetildirý arqyly memlekettik qyzmetke degen qyzyǵýshylyqty arttyryp, kadr aýysymdylyǵyn shtattyq quramnyń 6%-ǵa deıin tómendetýge septigin tıgizdi», - delingen Agenttik habarlamasynda.

Mansaptyq ilgerileýdi 8 myńnan astam memlekettik qyzmetshiler alyp, bul ótkizilgen barlyq konkýrstyń (13 758) qorytyndysy boıynsha taǵaıyndalǵandar sanynyń 60%-n qurady.

Ótken jyldyń kórsetkishterimen salystyrǵanda, sheteldik bilimi bar memlekettik qyzmekerler úlesi 15%-ǵa ósti (2018 jyly 2423-den 2019 jyly 2790-ǵa deıin).

Jalpy alǵanda, 91,9% qyzmetkerdiń joǵary bilimi bar. Qalǵan 8,1%-da orta jáne ortadan keıingi kásiptik bilimi bar jáne olar aýdandyq jáne aýyldyq deńgeılerde usynylǵan.

Memleketti qyzmetshilerdiń basym bóliginiń ekonomıka jáne bıznes, quqyq, tehnıkalyq jáne tehnologııalyq, bilim berý salalarynda joǵary bilimderi bar.

Aıta ketsek, búgin Memlekettik qyzmet isteri agenttiginiń 2019 jylǵy jumys qorytyndysy boıynsha alqa otyrysy ótti.