Qazaqstanda 9 jańa sý qoımasyn salýǵa qansha qarajat kerek

NUR-SULTAN. QazAqparat – Úkimet otyrysynda QR Ekologııa, geologııa jáne tabıǵı resýrstar mınıstri Serikqalı Brekeshev 9 jańa sý qoımasyn salý qandaı nátıje beretinin aıtty, dep habarlaıdy QazAqparat tilshisi.

«Aldaǵy 5 jylda 1,7 tekshe kılometr kóleminde sýdy shoǵyrlandyrý úshin 9 jańa sý qoımasyn salý josparlanǵan. Bul 14 eldi mekenge (70 myń adam) sý tasqyny qaýpin azaıtýǵa, 195,3 myń gektarda jańa sýarmaly jerlerdi aınalymǵa engizýge, aýyl sharýashylyǵynda 20 myńnan astam jumys ornyn qurýǵa múmkindik beredi», - dedi S. Brekeshev.

Onyń aıtýynsha, aldyn ala esepteýlerge sáıkes, 9 jańa sý qoımasyn salýdyń jalpy quny 59,4 mıllıard teńgeni quraıdy. Onyń ishinde 11,3 mlrd tengesi 2022-2024 jyldarǵa arnalǵan Respýblıkalyq bıýdjetten qoldaý tapty. Jobalaý-smetalyq qujattamany ázirleýdi aıaqtaý úshin qosymsha 700 mıllıon teńge, sonymen qatar qurylys-montajdaý jumystaryna 2025-shi jylǵa deıin 47,4 mlrd teńge qajet.

«Osy jobalardy iske asyrý nátıjesinde kórshi elderge sý táýeldiligin tómendetýge ákeledi», - dedi mınıstr.

Budan buryn habarlanǵandaı, Premer-Mınıstr Asqar Mamın Ekologııa mınıstrligine bir aı merzimde 9 sý qoımasy men 120 kanaldy salý men rekonstrýktsııalaýdyń, sondaı-aq olardy tsıfrlandyrýdyń jol kartasyn ázirleýdi tapsyrdy.