Qazaqstanda 9 aıda 60 mln. tonna munaı óndirildi - Energetıka mınıstri

ASTANA. QazAqparat - Aldyn ala málimetter boıynsha, aǵymdaǵy jyldyń 9 aıynda elimizde munaı óndirý 60 mln. tonnany qurady. Bul ótken jyldyń osy kezeńimen salystyrǵanda 99,2 paıyzdy quraıdy.

Búgin Parlament Májilisiniń Ekologııa jáne tabıǵatty paıdalaný komıtetiniń keńeıtilgen otyrysynda Energetıka mınıstri Vladımır Shkolnık osylaı málim etti.

«Byltyrǵy jyly biz jalpy alǵanda 81,8 mln. tonna munaı óndirgenbiz. Bıyl budan 2 mln. tonnaǵa artyq óndiremiz dep josparlaǵan edik. Alaıda, Qashaǵandaǵy irkilisterdiń saldarynan buǵan qol jetkizý múmkin bolmaıyn dep tur. Degenmen, Úkimet bizdiń aldymyzǵa byltyrǵy deńgeıge shyǵý týraly mindet júktedi. Biz osy baǵytta arnaıy jospar qurdyq», - deıdi V. Shkolnık.

Onyń aıtýynsha, esepti kezeńde Qazaqstandaǵy munaı óńdeý zaýyttary 10,99 mln. tonna munaı óńdegen, bul byltyrǵy jylǵy kórsetkishke qaraǵanda 101 paıyzdy quraıdy. Sonymen qatar, 9 aıda elimizden 47,4 mln. tonna munaı eksporttalǵan.