Qazaqstanda 9,1 mln tonna dándi daqyl qory bar

NUR-SULTAN. QazAqparat – QR Aýyl sharýashylyǵy vıtse-mınıstri Jeńis Óserbaı astyq pen un óndirisi týraly aıtyp berdi, dep habarlaıdy QazAqparat tilshisi.

«Ulttyq statıstıka bıýrosynyń resmı derekterine sáıkes, 2022 jylǵy 1 naýryzdaǵy jaǵdaı boıynsha respýblıkada 9,1 mln tonna dándi jáne dándi-burshaqty daqyldardyń qory bar. Respýblıka boıynsha barlyǵy 7,4 mln tonna bıdaı, 1,1 mln tonna arpa, 144 myń tonna júgeri dáni jáne 22,9 myń tonna qara bıdaı bar. Azyq-túlik bıdaıynyń qorlary ishki tutyný úshin de, qazirgi marketıngtik maýsymnyń sońyna deıin eksportqa jóneltý úshin de jetkilikti», - dedi spıker Ortalyq kommýnıkatsııalar qyzmetinde ótken baspasóz máslıhatynda.

Buǵan deıin Jeńis Óserbaı eldegi áleýmettik mańyzy bar azyq-túlik qory týraly aıtyp bergen edi.

Ákimdikterdiń jedel derekterine sáıkes, 12 naýryzdaǵy jaǵdaı boıynsha respýblıkada barlyǵy 1,3 mln tonna áleýmettik mańyzy bar azyq-túlik bar.

Onyń ishinde un – 144 myń tonna, qant – 90 myń tonna, kúrish – 39,3 myń tonna, makaron – 21 myń tonna jáne shamamen 900 myń tonna kókónis ónimderi jáne basqalary bar.

Sonymen birge, Qazaqstanda shamamen 90 myń tonna qant qory bar jáne respýblıka qantpen tolyq qamtamasyz etilgen.