Qazaqstanda 855 memlekettik mekeme «open space» formatyna kóshti

NUR-SULTAN. QazAqparat - «Halyq únine qulaq asatyn memleket» tujyrymdamasyn iske asyrý aıasynda Prezıdenttiń kómekshisi Tamara Dúısenovaǵa Sybaılas jemqorlyqqa qarsy is-qımyl agenttiginiń «Adaldyq alańy» jobalyq keńsesiniń jumysy tanystyryldy.Іs-sharaǵa agenttik tóraǵasy Alık Shpekbaev pen Nur-Sultan qalasynyń ákimi Altaı Kólginov qatysty, dep habarlaıdy QazAqparat.

Atalǵan agenttik málimetinshe, barlyq óńirlerdegi jobalyq bastamanyń qyzmeti turmystyq sybaılas jemqorlyqty joıýǵa, memlekettik qyzmetter alý kezinde qolaıly jaǵdaılar jasaýǵa jáne qoǵamdyq baqylaý tetikterin pármendi iske asyrýdy qamtamasyz etýge baǵyttalǵan.

«Agenttiktiń Parasattylyq departamentiniń dırektory Ǵanıjan Asanuly jobanyń el aýqymyndaǵy negizgi nátıjelerin baıandap, kez kelgen memlekettik organnyń qyzmetin baǵalaýdaǵy azamattar seniminiń basty talap ekenin atap ótti. Talqylaý barysynda memlekettik mekemelerdi transformatsııalaýdyń jáne memlekettik organdardyń qoǵammen ózara árekettestigi qaǵıdattarynyń mańyzdy róline basa nazar aýdaryldy», - dep atap ótedi vedomstvodan.

Qazirgi tańda Qazaqstanda 855 memlekettik mekeme «open space» formatyna kóshti, 584 mekeme halyqqa kedergisiz qyzmet kórsetýge arnalǵan front-keńselerdi ashty. Ártúrli deńgeıdegi 253 ákimdik óz qyzmetin servıstik úlgi negizderine beıimdedi.

Agenttik mundaı tájirıbeni óz úlgisimen kórsetedi. Departament qyzmetkerleriniń ashyq kabınetterin aralaǵan Tamara Dúısenova mundaı tásildiń aıqyndylyq pen senimge qolaıly jaǵdaı jasaıtynyna nazar aýdardy.

Astanalyq departament janyndaǵy «Antıkor Ortalyǵy» servıstik ortalyǵynyń qyzmeti Agenttiktiń qoǵamdyq uıymdarmen ózara isqımylyn jáne halyqpen tıimdi keri baılanysyn qamtamasyz etýge arnalǵan alań retinde qurylǵan. Qonaqtarǵa azamattardy qabyldaýdyń, sonyń ishinde «Protecting business and Investments» bıznesti sybaılas jemqorlyqqa qarsy súıemeldeý baǵyty boıynsha zamanaýı tetikteri tanystyryldy. Qyzmetkerler «AAntikor.Live brıfıngter men tikeleı efır stýdııasynyń jumysy týraly aıtyp berdi. Kez kelgen adam spıkerlerge suraq qoıa alady nemese keńes ala alady.

«Astana – Adaldyq alańy» jobalyq keńsesiniń basshysy Mıras Shekenov agenttiktiń astanalyq ákimdikpen tıimdi ózara is-qımyly týraly aıta kele, jobalyq keńseniń is-sharalarynyń júzege asyrylý barysyn baıandady. Memlekettik mekemelerdiń bıýdjet qarajatyn jumsaýyn onlaın rejımde qoǵamdyq baqylaý múmkindigin qamtamasyz etetin «Ashyq bıýdjetterdiń ınteraktıvti kartasy» erekshe qyzyǵýshylyq týdyrdy.

Kezdesý qorytyndysy boıynsha Tamara Dúısenova óńirlerdegi memlekettik organdardyń ashyqtyǵy men aıqyndylyǵyn qamtamasyz etý, qoǵammen syndarly yntymaqtastastyq ornatý qajettigin atap ótti. Onyń aıtýynsha, mundaı árekettestik kezinde azamattyń shaǵymdary sozbalańdyqqa salynbaı jáne ortalyq memlekettik organdarǵa amalsyz júginbeı, jergilikti deńgeıde barynsha sapaly qaralý qajet.