Qazaqstanda 8 myńnan astam temirjolshy bilimin jetildirdi

ASTANA. QazAqparat - «QTJ» UK» AQ - «Temirjol kóligi personalyn damytýdy baǵalaý ortalyǵy» jáne Aqtóbe, Pavlodar, Qaraǵandy, Taraz qalalaryndaǵy oqý oryndarynda 230 mamandyq boıynsha temirjolshylar bilimin jetildirdi, dep habarlady Ulttyq kompanııanyń baspasóz qyzmetinen.

Ulttyq kompanııanyń qurylymdyq bólimsheleri men enshiles kásiporyndarynda uqsas mamandyqtarǵa daıarlaý qaıta daıarlaý arnaıy suranystar boıynsha júrgiziledi. «QTJ» UK» AQ oqý ortalyǵynda temirjolshylar jolaýshylar tasymaldaý, lokomotıv, vagon sharýashylyǵy, dánekerleý isi, aqaý tabýshy, tasymaldaý úderisi, elektrlendirý men energetıka, belgi berý jáne baılanys, eńbekti qorǵaý jáne tehnıkalyq qaýipsizdik, ónerkásip qaýipsizdigi jáne basqa da mamandyq túrlerine baýlıdy. Óndiristegi kadrlerdi uqsas mamandyqtarǵa qaıta daıarlaý úsh aıdan alty aıǵa deıin júrgiziledi. Olardyń ishinde elektrovoz, teplovoz mashınısteri, drezına júrgizýshi, elektromehanıkter, stantsııa kezekshileri, jol sheberi, jol brıgadırine mańyz berilgen. Temirjol kóligi mamandarynyń personalyq damytý ortalyǵynda oqytýǵa qajetti barlyq jaǵdaılar jasalǵan. Onda óndiriste ysylǵan bilikti oqytýshylar sabaq beredi. Materıaldyq tehnıkalyq bazasy jaqsy. Oqý zerthana keshenimen, sońǵy úlgidegi ınnovatsııalyq tehnıkalarmen jaraqtandyrylǵan.