Qazaqstanda 732 myń sharshy metr turǵyn úı paıdalanýǵa berildi - UEM

NUR-SULTAN. QazAqparat – Óńirlerdiń kóbinde ınvestıtsııalar ósimi baıqaldy. Bul týraly jyldyń birinshi aıyndaǵy damý kórsetkishterine arnalǵan Úkimet otyrysynda QR Ulttyq ekonomıka mınıstri Rýslan Dálenov málim etti, dep habarlaıdy QazAqparat tilshisi.

«Óńirlerdiń kóbinde ınvestıtsııalar ósýde. Jalpy alǵanda, ınvestıtsııalardyń ósýi 3,1 paıyzdy qurady. 7 óńirde ósý 20 paıyzdan 76 paıyz aralyǵynda boldy. Eń joǵary ósýdi Shyǵys Qazaqstan oblysy kórsetti – 1,8 ese deńgeıinde. 3 paıyzdan tómen ósý 6 óńirde baıqaldy, onyń ishinde 4 óńir boıynsha tómendeý tirkeldi», - dedi mınıstr.

Onyń sózine qaraǵanda, ekonomıkanyń bazalyq salalary arasynda eń joǵary ósý qurylys sektorynda baıqaldy. Bul kórsetkish 12,5 paıyzdy qurap otyr. Eń joǵary ósýdi Túrkistan oblysy kórsetti – 80%. Bul Túrkistan qalasyn oblys ortalyǵy retinde damytýdyń belsendi júrgizilip jatqanyn kórsetedi. 5 paıyzdan joǵary ósýge 6 óńir qol jetkizdi. Al 8 óńirde tómendeý tirkeldi.

Budan bólek mınıstr qańtarda 732 myń sharshy metr turǵyn úı paıdalanýǵa berilgenin atap ótti. Nur-Sultan (117 myń sharshy metr), Almaty (84 myń sharshy metr) qalalarynda jáne Mańǵystaý oblysynda (85 myń sharshy metr) eń kóp turǵyn úı paıdalanýǵa berildi.