Qazaqstanda 700 myńǵa jýyq múmkindigi shekteýli adam ómir súredi
Bul týraly QR Eńbek jáne halyqty áleýmettik qorǵaý mınıstriniń orynbasary Svetlana Jaqypova aıtty.
«Balalarǵa bilim berý uıymdaryn qoljetimdi etýde alǵa ilgerileýshilik bar. Elimizde 4 myńnan astam uıym erekshe qajettiligi bar balalardy qabyldaýǵa daıyn. Eń bastysy olardyń erekshelikterine qaraı belgili bir bilim berý bazasyn qalyptastyrý kerek. Bul úshin arnaıy bilim berý baǵdarlamalaryn jasap, olarmen jumys isteı alatyn pedagog mamandardy ázirleýdi usynamyz. Onlaın-oqytýdy qolǵa alý kerek. Búginde Qazaqstanda 15 myńnan astam bala úıden oqıdy. Bul - jaqsy kórsetkish emes», - dedi vıtse-mınıstr Úkimette ótken baspasóz máslıhatynda.
Sonymen birge, S. Jaqypova ınklıýzıvti bilim berý aıasynda múmkindigi shekteýli balalarǵa jaǵdaı jasap, olardy áleýmettendirýdi usyndy.
«Dál osy maqsatta Bilim jáne ǵylym, Densaýlyq saqtaý mınıstrlikterimen birigip, úıden oqıtyn balalardyń syrqattar tizimi jasalady. Eger balanyń mektepke barýǵa shamasy jetse, qatarlastarymen birge mektepke barýy tıis. Al mektepke bara almaǵan balalardy qashyqtyqtan oqý protsesine qatystyrýymyz kerek. Bul platforma bilim berýdiń barlyq deńgeıinde - mektep, kolledj jáne ýnıversıtetterde júzege asyrylady», - dedi ol.
Aıta keteıik, Qazaqstanda 685 myńnan astam múgedektigi bar adamdar ómir súredi, onyń 421 myńy - eńbekke qabiletti jasta, 176 myńy - zeınet jasynda al 18 jasqa deıingi balalar sany - 88 myń.
Ótken aıda múgedektigi bar adamdardyń turmys sapasyn jaqsartýǵa baǵyttalǵan 7 jyldyq ulttyq jospar qabyldandy. Bul jospar 7 baǵytta - múgedektikti aldyn alý men profılaktıka, ınklıýzıvti bilim berý jáne bilimniń qoljetimdiligi, kedergisiz orta, ekonomıkalyq derbestik jáne sapaly jumyspen qamtý, áleýmettik ońaltý men abılıtatsııany damytý; áleýmettik qyzmetter kórsetý júıesin jańǵyrtý jáne qoǵamdyq sanany jańǵyrtý boıynsha júzege asyrylady.