Qazaqstanda 7 myńnan astam sheteldik kólik halyqaralyq júkterdi zańsyz tasymaldaǵan

ALMATY. QazAqparat– Jyl basynan beri elimizde 7 myńnan astam sheteldik kólik halyqaralyq júkterdi zańsyz tasymaldaǵan. Bul týraly Almatyda ótken baspasóz brıfınginde QR IIDM Kólik komıtetiniń ahýal ortalyǵy basshysy Qýanysh Ermuhanov aıtty, dep habarlaıdy QazAqparat tilshisi.

«Aǵymdaǵy jyldyń basynan bastap kóliktik baqylaý beketterinde 72 510 sheteldik kólik quraly tekserildi, onyń ishinde 7410 kólikke syrtqy shekarada eskertpe qaǵazdary berilgen. ıAǵnı, bul eskertý habarlamalar Eýrazııalyq ekonomıkalyq odaqtyń kedendik shekarasyna kirgen kezde sheteldik júk kólikteriniń bizdiń zańnamamyzdy buzǵandyǵynyń dáleli», - dedi Qýanysh Ermuhanov.

Onyń aıtýynsha, EEO sheńberindegi kelisimsharttyq mindettemelerge sáıkes, sheteldik tasymaldaýshyǵa eskertpe qaǵazy berilse, ol mindetti túrde jaqyn jerde ornalasqan kedendik baqylaý beketinde alǵan eskertpesin oryndaıtynyn qujat arqyly dáleldeýi kerek. Tek sol kezde ǵana ınspektorlar oǵan bir aıǵa ruqsat beredi.

Sonymen qatar, spıker ústimizdegi jyldyń 15 qarashasynan bastap Kólik komıteti ishki múddelerdi qorǵaý maqsatynda kóliktik baqylaýǵa baǵyttalǵan aktsııa jarııalanǵanyn atap ótti.

«Osy aktsııa aıasynda sheteldik avtokólikterge qatysty baqylaý jáne aldyn alý sharalary júrgizilýde. Búgingi kúni zańbuzýshylyq faktileri anyqtalyp jatyr. Naýqan qorytyndysy boıynsha tıisti sharalar ázirlenip, qabyldanatyn bolady», - dedi Qýanysh Ermuhanov.