Qazaqstanda 68 myńnan astam memlekettik qyzmetshi biliktiligin arttyrdy

NUR-SULTAN. QazAqparat – Ótken jyly elimizde 68 myńnan astam memlekettik qyzmetshi bilimin jetildirdi. Bul týraly QR Prezıdentiniń janyndaǵy memlekettik basqarý akademııasynyń rektory Erlan Ábil QR Memlekettik qyzmet isteri agenttiginiń keńeıtilgen alqa otyrysynda málim etti, dep habarlaıdy QazAqparat tilshisi.

«Ótken jyly akademııada oqý baǵdarlamalary bekitilgen josparǵa saı iske asyryldy. Qańtardan qazanǵa deıin oqý onlaın formatta, keıin aralas formatta ótti. Qysqa merzimdi oqytýdyń tıimdiligin kúsheıtý maqsatynda akademııa koýchıngtik tehnologııalar men assesment quraldaryn qoldana otyryp, korporatıvtik biliktilikti arttyrý semınarlaryn iske asyrý boıynsha jobalardy jalǵastyrdy. Mundaı format kezinde tyńdaýshylar memlekettik organnyń naqty problemalaryn sheshýge qatysyp, toptyq jobalar jasaıdy. 2021 jylǵy sáýir-shilde aralyǵynda akademııa jáne onyń fılıaldary QR Ádilet mınıstrligimen birlesip, QR ákimshilik rásimdik-protsestik kodeksiniń normalary boıynsha 68 myńnan astam memlekettik qyzmetshilerin oqytyp shyǵardy», - dedi Erlan Ábil.

Akademııa basshysynyń aıtýynsha, odan 36 myńnan astam memlekettik qyzmetshi qysqa merzimdi oqytýdan ótti.

«Sonymen qatar biz ekologııa, geologııa jáne tabıǵı resýrstar mınıstrligimen birlesip, UN PAGE baǵdarlamasynyń (BUU-nyń Jasyl ekonomıka boıynsha is-qımyl jónindegi áriptestigi) jáne halyqaralyq yntymaqtastyq jónindegi German qoǵamynyń qoldaýymen 700 memlekettik qyzmetshini, onyń ishinde Tájikstan, Qyrǵyzstan, Ózbekstan jáne Túrikmenstannan kelgen memlekettik qyzmetshilerdi oqytý boıynsha «Jasyl ekonomıka jáne tómen kómirtekti damý» jobasyn iske asyrdyq», - deıdi ol.

Odan bólek, rektor ótken jyly qazanda akademııada memlekettik basqarý salasyndaǵy qazaqstandyq tájirıbeni zerdeleý jáne ulttyq jobalardy iske asyrý maqsatynda Reseıdiń basqarýshy kadrlary rezerviniń joǵary deńgeıin daıarlaý baǵdarlamasy boıynsha taǵylymdama uıymdastyrylǵanyn aıtyp ótti.