Qazaqstanda 608 myńnan astam adam baspanaǵa muqtaj

NUR-SULTAN. QazAqparat – Elimizde 608 myńnan astam adam turǵyn úıge muqtaj. Bul týraly QR Indýstrııa jáne ınfraqurylymdyq damý mınıstrligi Qurylys jáne turǵyn úı-kommýnaldyq sharýashylyq isteri komıteti tóraǵasynyń orynbasary Ázimbek Nálibaev málim etti, dep habarlaıdy QazAqparat tilshisi.

«Memlekettik basym baǵyttardyń biri – turǵyndardyń baspana máselesin sheshý. Qazirgi ýaqytta 608 myńnan astam qazaqstandyq baspanaǵa muqtaj. Onyń ishinde 242 myń adam áleýmettik osal top sanatyna jatady, 85 myńnan astam kópbalaly otbasy jáne 217 myńnan astam bıýdjet salasy qyzmetkerleri bar. Sonymen qatar ata-ana qamqorlyǵynan aıyrylǵan 60 myńnan astam jan turǵyn úı kezeginde tur», - dedi Ázimbek Nálibaev Ortalyq kommýnıkatsııalar qyzmeti alańynda ótken baspasóz máslıhatynda.

Onyń aıtýynsha, joǵaryda atalǵan azamattardy turǵyn úımen qamtý máselesi «Nurly jer» memlekettik baǵdarlamasy aıasynda júzege asyp jatyr.

«Atap aıtqanda, óńir ákimdikteri satyp alý quqyǵynsyz jalǵa beriletin baspanalar salyp jatyr. Sol sekildi kredıttik turǵyn úıler bar. Odan bólek, bıyl 18 sáýirden bastap jekelegen sanattarǵa jatatyn azamattardan «Otbasy bank» AQ arqyly jalǵa beriletin turǵyn úı aqysyn tóleýge sýbsıdııa alýǵa ótinish qabyldanyp jatyr. Memleketten sýbsıdııa alýǵa kópbalaly otbasylar, 1, 2-toptaǵy múgedek jandar, jetim balalar jáne múgedek bala tárbıelep otyrǵan otbasylar qujat tapsyra alady», - deıdi ol.