Qazaqstanda 600-ge jýyq ákim aýysty - Ortalyq saılaý komıssııasy
Komıssııa tóraǵysynyń orynbasary Konstantın Petrovtyń aıtýynsha, byltyr komıssııasy aýyl ákimderin saılaý naýqandaryn jiti baqylady. Jalpy, ótken jyly aýmaqtyq komıssııalar 570 ákimniń saılaýyn uıymdastyrdy.
«2018 jyly Qazaqstanda barlyǵy 2 429 saılanbaly ákim boldy. Demek, solardyń tórtten birine (23%) jýyǵy qaıta saılandy. Ákimderdiń ókilettilikterin tapsyrýdyń negizgi sebepteri - óz ótinishimen jumystan ketý (254 adam), basqa qyzmetke taǵaıyndaý (137 adam), ókilettilikterdiń aıaqtalýy (98 adam) jáne taǵy basqa», - dedi K.Petrov komıssıııanyń keńeıtilgen otyrysynda.
Onyń sózine qaraǵanda, byltyr saılaý zańnamasyn jetildirýge qatysty biraz sharalar atqarylǵan. Sonyń nátıjesinde máslıxattardyń proportsıonaldy saılaý júıesi engizilip otyr. Saıası partııalardyń aımaqtardaǵy róli kúsheıedi. Budan bólek, saılaýshylardyń tizimderi men málimetteri jeke tulǵalar týraly memlekettik derekter qorynyń negizinde qalyptastyrý jumysy qolǵa alyndy.
Atalǵan shara saılaýshylardyń tizimin keńeıtýge jol ashady, Prezıdentti, Parlament Májilisi men máslıxat depýtattaryn saılaý boıynsha azamattardyń konstıtýtsııalyq quqyqtaryn kedergisiz iske asyrýyna múmkindik beredi.
Saılaýaldy pikirtalastardy ótkizý quqyǵy aımaqtyq saılaý komıssııalaryna berilgen. Osylaısha, máslıxat depýtattyǵyna úmitkerler jergilikti deńgeıde óz saılaýaldy tuǵyrnamalary boıynsha pikirsaıystar ótkize alady.
«Al saılaý komıssııalary quramynyń jartysynan kóbi bir uıymnyń qyzmetkerleri bolmaýy kerek. Komıssııa quramyna jaqyn týystardyń kirýine shekteý engizildi», - dep atap kórsetti K.Petrov.