Qazaqstanda 6 mıllıonnan astam adam seısmıkalyq qaýipti aımaqta turady

ALMATY. QazAqparat - Elektrondy úkimettiń saıtynda QR Úkimetiniń «Qazaq qurylys jáne sáýlet ǵylymı-zertteý jáne jobalaý ınstıtýty» aktsıonerlik qoǵamynyń ataýyn ózgertý týraly» qaýlysynyń jobasy jarııadandy, dep habarlaıdy QazAqparat tilshisi.

Jobada QazQSǴZI ataýyn «Qazaq seısmıkalyq berik qurylys jáne sáýlet ǵylymı-zertteý jáne joba-eksperımentaldyq ınstıtýty» AQ dep ózgertý usynylǵan.

Jobada, ınstıtýttyń ataýyn ózgertýdiń basty sebebi retinde, onyń qurylys salasyndaǵy seısmıkalyq qaýipsizdikti qamtamasyz etý máselelerin qamtıtyn qyzmeti atap kórsetilgen. Qoǵamnyń osy qyzmetiniń nátıjesinde Qazaqstan naryǵynda balamasy joq ónimder (saraptama qorytyndylary, arnaıy tehnıkalyq jaǵdaılar, ǵylymı-tehnıkalyq esepter, normatıvter, kúrdeli nysandardyń jobalary, usynystar, t.b.) jasalady.

«Qazaqstan aýmaǵynyń seısmıkalyq qaýipti aımaq sanalatyn  úshten bir bóliginde 6 mıllıonnan astam adam turady. 400-den astam qalalar men eldi mekender, ónerkásip áleýetiniń 40%-y osy aımaqtarǵa shoǵyrlanǵan. «QR seısmıkalyq aýdandaryndaǵy (aımaqtarynda) qurylys» erejeleri jınaǵyna (2.03-30-2017 QR EJ) sáıkes, Almaty qalasy, Almaty, Atyraý, Aqtóbe, Shyǵys Qazaqstan, Jambyl, Batys Qazaqstan, Qaraǵandy, Qyzylorda, Mańǵystaý, Ońtústik Qazaqstan oblystary seısmıkalyq qaýipti aımaqta ornalasqan. Uıymnyń eski ataýyn jańǵyrtýdyń negizi osynda jatyr», - delingen qujatta.

Budan tys, sońǵy onjyldyqtarda Atyraý, Batys Qazaqstan, Mańǵystaý oblystarynda ornalasqan munaı ónerkásibine mamandanǵan aýdandarda, kómirsýtek shıkizatyn qarqynmen óndirýge baılanysty, tehnogendik sıpattaǵy qýatty jer silkinisteri bolý qaýpi bar.

Qazirgi kezde el aýmaǵynda negizgi qyzmeti seısmıkalyq qurylystarǵa mamandanǵan basqa uıym joq. Osyǵan baılanysty, seısmıkalyq qurylys jónindegi fýnktsııalardy jarǵy kapıtalyna memleket qatysatyn zańdy tulǵaǵa berý qajettigi týyndap otyr, - delingen qaýly jobasynda.

Qaýly jobasyn jarııaly talqylaý 18 qyrkúıekke deıin jalǵasady.