Qazaqstanda 6 aıda 36,7 mln. tonna munaı óndirildi

ASTANA. QazAqparat - Qazaqstanda ótken 6 aı ishinde 36,7 mln. tonna munaı óndirildi. Bul ótken jyldyń sáıkes kezeńimen salystyrǵanda 98,4 paıyzdy qurap otyr. Búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte Munaı jáne gaz mınıstri Uzaqbaı Qarabalın osylaı málimdedi.

Mınıstrdiń aıtýynsha, Qazaqstandaǵy munaı óndiretin iri kompanııalar «TShO» (TeńizShevroıl), «KPO» (Qarashyǵanaq Petroleıým Opereıtıng), «MańǵystaýMunaıgaz», «ÓzenMunaıgaz» kompanııalary bolyp otyr. Olardyń jıyntyq óndirý úlesi jalpy munaı óniminiń shamamen 63 paıyzynan asady.

«Jartyjyldyqtyń qorytyndylary boıynsha «MańǵystaýMunaıgaz» byltyrǵa qaraǵanda munaı óndirýdi 104,2 paıyzǵa, «ÓzenMunaıgaz» kompanııasy 103,5 paıyzǵa, «KPO» 107 paıyzǵa, «TShO» 95,8 paıyzǵa oryndady» , - dedi U. Qarabalın.

Bul rette mınıstr «TShO» óziniń zaýytynda jalpy ýaqyty 73 kúndi quraıtyn eki kúrdeli jóndeý jumystaryn júzege asyrýdy josparlaǵanyn atap ótti.

«Jalpy bizdiń mindetimiz 2014 jyly munaı óndirý kórsetkishin byltyrǵy rekordtyq deńgeıde saqtap qalý. Byltyr elimizde 81, 8 mln. tonna munaı óndirilgen edi», - dedi mınıstr.