Qazaqstanda 6-9 jas aralyǵyndaǵy balalardyń 20 paıyzynda artyq salmaq bar
Bul jaıly búgin «Qazaqstandaǵy balalar semizdiginiń taralýyn zertteý» konferentsııasynda QR Densaýlyq saqtaý mınıstriniń birinshi orynbasary Marat Shoranov málimdedi.
«Búginde balalar semizdigi – álemniń kóptegen elderimen birge Qazaqstandy da mazalap otyr. Elimiz osy ózekti máseleni nazardan tys qaldyrǵan joq.
Jalpy adam densaýlyǵy tek 10 paıyzǵa medıtsına júıesiniń sapasyna baılanysty, al qalǵan 90 paıyzy qorshaǵan ortaǵa, ómir saltyna, ishken asqa tikeleı qatysty. Respýblıka aýmaǵynda balalar semizdigine oraı zertteý júrgizilgen. Sonyń nátıjesinde, 6-9 jas aralyǵyndaǵy balalardyń 20 paıyzynan artyq salmaq anyqtaldy. Onyń ishinde qyzdarǵa qaraǵanda uldardyń úlesi basym», - dedi ol.
Marat Shoranovtyń aıtýynsha, 18 jasqa deıingi balalar arasynda semizdikke shaldyqqandar úlesi 6,5%-dy qurap otyr.
«Semizdik qalada turatyn balalarda, aýyldaǵylarǵa qaraǵanda kóbirek tirkelgen. Mınıstrlik balalar semizdiginiń aldyn alý úshin birqatar sharany iske asyrýda. Atap aıtqanda, balalar tutynatyn taýarlardaǵy maılylyqty azaıtý, quramyn ózgertý jáne oqýshylardyń durys tamaqtanýyn qamtamasyz etý úshin mekteptegi ashanalar mázirin tekserý jumystary júrgizildi», - dedi mınıstrdiń birinshi orynbasary.