Qazaqstanda 55 jastan asqan áıelderdiń 24 paıyzynyń tabysy joq - mınıstrlik

NUR-SULTAN. QazAqparat – Elimizdegi 55 jastan asqan áıelderdiń 24 paıyzynyń tabysy joq. Bul týraly Eńbek jáne halyqty áleýmettik qorǵaý mınıstrliginiń 2025 jylǵa deıingi eńbek naryǵyn damytý jónindegi keshendi josparynda aıtylǵan, dep habarlaıdy QazAqparat tilshisi Ashyq NQA portalyna silteme jasap.

«Búgingi tańda Qazaqstanda 55 jastan asqan tabysy joq áıelderdiń úlesi joǵary. Máselen, eldegi 55-60 jas aralyǵyndaǵy áıelder sany 634,5 myń, olardyń 24 paıyzynyń tabysy joq. Mundaı sanattaǵy adamdar Almaty, Túrkistan oblystarynda jáne Almaty qalasynda kóp. Aıta ketý kerek, bul kórsetkish áıelderdiń osy sanaty arasynda kedeılikti kórsetip qana qoımaıdy, sonymen qatar olardyń bolashaq zeınetaqysynyń mólsherine áser etetin jaǵymsyz saldary bar», - dep kórsetilgen mınıstrik usynǵan josparda.

Eske sala ketsek, buǵan deıin Eńbek jáne halyqty áleýmettik qorǵaý mınıstri Tamara Dúısenova zeınet jasyn azaıtý emes, zeınetaqyny kóbeıtý máselesin sheshý kerektigin aıtqan bolatyn.