Qazaqstanda 52 mlrd teńgeniń jobasy aıaqtalmaı qalǵan – Esep komıteti

NUR-SULTAN. QazAqparat - Qazaqstanda 52 mlrd teńgeniń 43 jobasy aıaqtalmaı qalǵan. Bul týraly Parlament Senatynda respýblıkalyq bıýdjettiń atqarylýyn baqylaý jónindegi esep komıtetiniń tóraǵasy Natalıa Godýnova málim etti, dep habarlaıdy QazAqparat tilshisi.

«Bıyl tıimdilik prızmasy arqyly memlekettik resýrstardy shyǵyndaý máselesin pılottyq rejımde tekserip kórdik. Salynǵan memlekettik ınvestıtsııalardyń ekonomıkalyq tıimdiligine taldaý júrgizildi. Naqtyraq aıtqanda ekonomıkanyń damýyna tikeleı yqpal etetin shyǵyndar baǵalandy. Bul tek damý bıýdjeti ǵana emes, kapıtaldyq shyǵyndar men sýbsıdııalaýlar, nesıeleýler. 2019 jyly mundaı shyǵyndardyń mólsheri respýblıkalyq bıýdjettiń jalpy 14 paıyzyn qurady. Dál osy jınaq ekonomıkanyń ósimi úshin resýrstardy túrlendirýge múmkindik beredi», - dedi Natalıa Godýnova.

Esep komıtetiniń aıtýyna qaraǵanda shyǵyndar qurylymyndaǵy kólemniń 14 paıyzynyń ishinde qurylys salasyna, maqsatty transfertke resýrstyń 40 paıyzy jumsalǵan.

«Sonymen birge halyq úshin mańyzy bar bastalyp qoıǵan, alaıda aıaqsyz qalǵan ártúrli jobalar qordalanyp qaldy. Ákimdiktermen birlese otyryp 52 mlrd teńgelik dál osyndaı 43 jobany sanap shyqtyq. Shyǵyn shyqqanymen ol jobalardyń keıbiri aıaqtalmaıtyn da sekildi. Jeke jobalar boıynsha keı merzim 5 jylǵa deıin sozylyp ketken. Qaı óńirde qandaı nysandar týraly áńgime aıtylyp otyrǵanyn bári de biledi. Álbette ol jobalardy aıaqtaýǵa qosymsha qarajat kerek. Al aımaqta ol soma joq. Bul fakttar Memleket basshysynyń áleýmettik-ekonomıkalyq tıimdiligine ıe jobalardy qarjylandyrý týraly tapsyrmasyna qarama-qaıshy keledi», - dedi Natalıa Godýnova.