Qazaqstanda 50 myńǵa jýyq erli-zaıyptylar nekesin onlaın tirkedi

NUR-SULTAN. QazAqparat - Jyl basynan beri 50 myńǵa jýyq jup egov.kz portaly arqyly nekelerin tirkep, otbasyn qurdy, dep habarlaıdy QazAqparat «Azamattarǵa arnalǵan úkimet» memkorporatsııasyna silteme jasap.

Nekeni tirkeýdiń onlaın joly óte ońaı. Nekelerin zańdy túrde rásimdeımin degen jas jubaılar egov.kz portalynyń qyzmetine júginýi tıis, ol úshin ekeýiniń de elektrondy tsıfrlyq qoltańbasy (qosymsha mobıldi azamattar bazasynda tirkeýi) bolýy tıis. Kúıeý jigit portalǵa kirip, qyzmetti tańdaǵannan keıin, bolashaq jary men óziniń jeke sáıkestendirý nómirin engizedi. Keıin ol nekeleri tirkeletin jergilikti atqarýshy organnyń tirkeý bólimin tańdap, qyzmet qunyn tóleýi tıis.

Budan keıin qalyńdyq ta portalǵa kirip, «Qyzmetterdi alý tarıhy» taraýyn tańdap, ótinishti elektrondy tsıfrlyq qoltańbasymen rastaıdy. Nekeni tirkeý kúni jáne orny týraly habarlama portaldaǵy jeke kabınetke keledi.

Erli-zaıyptylardyń tirkeýin jaýapty organ ótinish berilgen kúnnen bir aı ótken soń júrgizedi.

Aıta keteıik, portal arqyly ótinishti 18 jastan asqan, nekege alǵash ret turǵaly jatqan jandar ǵana bere alady.