Qazaqstanda 5 myń is elektrondy túrde tergelýde

ASTANA. QazAqparat - Tsıfrlandyrý múmkindikterimen tergeý amaldary barysynda zańsyzdyqtarǵa jol berilmeıdi. Bul týraly Zańdylyqty, quqyqtyq tártipti jáne qylmysqa qarsy kúresti qamtamasyz etý jónindegi úılestirý keńesiniń otyrysynda Bas prokýror Qaırat Qojamjarov málim etti, dep habarlaıdy QazAqparat.

«Álem boıynsha Qazaqstan qylmystyq-elektrondyq isti engizgen 40 memlekettiń ishine kirse, TMD elderiniń arasynda birinshi bolyp turmyz. Qazirgi tańda atalǵan joba «Tsıfrlyq Qazaqstan» baǵdarlamasy aıasynda iske asyrylýda. Elektrondyq qylmystardy júrgizý 2017 jyldan bastap birinshi satyda teris qylyqtar, aýyr emes qylmystar boıynsha engizilýde. Jalpy, elektrondy túrde 5 myńǵa jýyq is tergelýde, onyń 2,3 myńnan astamy sotqa joldandy. Tergeýshilermen qatar, elektrondyq isterdiń materıaldarymen jumys isteýge 900-den astam advokatqa jáne protseske qatysýshylarǵa ruqsat berildi», - dep toqtaldy Qaırat Qojamjarov.

Onyń sózine qaraǵanda, tsıfrlandyrý múmkindigi arqyly tergeý amaldary barysynda jalǵan qujattardy jasaý nemese basqa da zańsyzdyqqa jol berilmeıdi.

«Bizdiń maqsattarymyz qandaı? Birinshiden, qylmystyq tergeýden bastap, sotta qarap, úkimniń oryndalýyna deıin búkil protsesti avtomatty túrde jyldamdatý men jeńildetý. Ekinshiden, tergeý kezinde jalǵan qujattardy jasaýǵa jáne engizilgen málimetterdi ózgertýge jol bermeý, sybaılastyqty tómendetý. Úshinshiden, vedomstvolyq, prokýrorlyq ári sottyq baqylaýdyń tıimdiligin arttyrý», - dedi Q. Qojamjarov.

Bas prokýror atap ótkendeı, elektrondy sot isin júrgizýdi tolyqqandy engizý úshin qylmystyq qýdalaý organdaryn qarjylandyrý, tıisinshe tehnıkalyq jaraqtandyrý jáne qyzmetkerlerge ony júrgizý daǵdylaryn oqytý máselelerin sheshý qajet. Osyǵan baılanysty Úkimet músheleri jobany odan ary iske asyrý úshin qarjy bólý baǵytyn talqylady. Al quqyq qorǵaý organdarynyń basshylaryna qylmystyq protsesti kezeń-kezeńmen avtomattandyrý merziminiń múltiksiz saqtalýyn qamtamasyz etý tapsyryldy.