Qazaqstanda 5 115 Uly Otan soǵysynyń ardageri qaldy

ASTANA. QazAqparat - Qazirgi kezde Qazaqstanda Uly Otan soǵysynyń kózi tiri 5 115 ardageri ómir súredi. Bul týraly búgin Ortalyq kommýnıkatsııalar qyzmetinde ótken brıfıngte «QR ardagerler uıymy» qoǵamdyq birlestigi ortalyq keńesiniń tóraǵa orynbasary Bekbolat Muqyshev aıtty.

«Qazaqstanda búgingi kúni 5 115 UOS ardageri qaldy. Ókinishke qaraı, olar jyldan-jylǵa azaıyp keledi. Ózderińiz bilesizder, Otan soǵysyna 1 mln. 200 myń qazaqstandyq qatysqan bolatyn, olardyń tek jartysy ǵana aman oralǵan edi», - dep atap ótti ol.

B. Muqyshevtyń aıtýynsha, qoǵamdyq birlestik «Nur Otan» partııasymen jáne «samuryq-Qazyna» qorymen birlese otyryp, jeńistiń mereıtoıyna oraı birqatar sharalar uıymdastyrmaq.

«Sharalar aıasynda ardagerlerimizdiń qajettilikteri tekserilip, ómir súrý jaǵdaılary, densaýlyǵy tolyq baqylaýǵa alynady. Jalpy, Jeńistiń 70 jyldyǵy búkil Respýblıka kóleminde toılanatyn bolady. Memleket basshysy óz sózinde osy aıtýly oqıǵany ardagerlemizige degen barynsha qamqorlyqpen, tarıh aldyndaǵy úlken mártebemen qarsy alýymyz kerek ekenin birneshe ret qadap aıtty», - dedi ol.