Elimizde 4,2 myń medbıkeniń orny bos tur, mamandar tapshy

<p>ASTANA. KAZINFORM &mdash; 12 mamyrda búkil álemde Halyqaralyq medbıkeler kúni atalyp ótedi. Bıyl elimizde 147 myńǵa jýyq medbıke kásibı merekesin toılap jatyr. Qoǵamdyq saıasat ınstıtýty osy saladaǵy mamandardyń jumysyna sholý jasady.&nbsp;</p>

Elimizde orta medıtsınalyq personaldyń sany jyl saıyn artyp kele jatqanyna qaramastan kadr tapshylyǵy áli de saqtalyp otyr.

Búginde 4,2 myńǵa jýyq orta býyn mamany jetispeıdi.

Sonymen qatar, meıirbıke mamandarmen qamtamasyz etý tómen deńgeıde qalyp otyr: 10 myń adamǵa — 74,7, akýsherııada 10 myń adamǵa — 5.

Mysaly DDU sońǵy dereginshe (2020) Eýropa elderinde meıirbıke jáne akýsher mamandardyń adam sanyna shaqqandaǵy kólemi mynadaı:

• Fınlıandııa — 10 myń adamǵa 223,3;
• Shvetsııa — 10 myń adamǵa 215,9;
• Belgııa — 10 myń adamǵa 201,3;
• Shveıtsarııa — 10 myń adamǵa 187,1;
• Norvegııa — 10 myń adamǵa 185,1.

Aıta ketý kerek, búkil álemde densaýlyq saqtaý júıesinde medbıkeniń róli artyp keledi. Jalpy, medbıke isi salasynda qyzyq tendentsııalar baıqalady.

Máselen, densaýlyq saqtaýdaǵy jumys kúshiniń ınnovatsııasy retinde medbıkelik fýnktsııalardy keńeıtý.

Bastapqy medıtsınalyq-sanıtarlyq kómek kórsetý mekemelerindegi kadr tapshylyǵyn, sondaı-aq jalpy tájirıbe dárigerleriniń joǵary júktemesin eskere otyryp, kóptegen elder medıtsına mindetteriniń bir bóligin medbıkege berý jóninde sheshim qabyldaǵan (Shveıtsarııa, Ulybrıtanııa, Fınlıandııa, Irlandııa, Polsha jáne basqa).

Meıirbıkelik qyzmettiń jańa modelin ázirleý jáne engizý jobasy aıasynda (2017 jyldan bastap) Qazaqstanda birqatar dárigerlik fýnktsııalardy (patronaj, vaktsınatsııa, skrınıng jáne birqatar dıagnostıkalyq jáne emdik protsedýralar) óz moınyna alǵan ozyq tájirıbeli medbıke laýazymy engizildi. 

Taǵy bir úrdis — joǵary bilimi bar medbıkeler úlesin arttyrý. DDU usynymy boıynsha joǵary bilimi bar medbıkelerdiń úlesi keminde 10% bolýy kerek.

2022 jylǵy jaǵdaı boıynsha Amerıka Qurama Shtattaryndaǵy medbıkelerdiń 71,7 paıyzynyń bakalavr nemese odan joǵary dárejesi bar.

Qazaqstanda medbıke mamandaryn daıarlaýdyń kóp deńgeıli júıesi engizilgen.

Sonymen qatar, jumys isteıtin medbıkeler úshin ıntegratsııalanǵan akademııalyq jáne qoldanbaly bakalavrıat baǵdarlamalary ázirlendi. 

Osyǵan oraı elimizdegi 37 medıtsınalyq kolledj Joǵary kolledj mártebesin alyp, qoldanbaly bakalavrlardy daıarlaıdy. 

Búginde bilikti meıirbıke mamandaryna suranys kúnnen kúnge artyp otyr.

Dúnıejúzilik densaýlyq saqtaý uıymynyń málimetinshe, 2020 jyly medbıkelerdiń jahandyq jumys kúshiniń tapshylyǵy — 5,9 mıllıon adam bolǵan.

Medbıke jetispeýshiligi Afrıka, Ońtústik-Shyǵys Azııa jáne Latyn Amerıkasynyń birqatar elderinde óte ótkir tur.

Eńbek resýrstaryn damytý ortalyǵynyń málimetinshe, aldaǵy 5 jylda medbıke kadrlaryna suranys 39 myń adamǵa jetedi. 

Eńbek jáne halyqty áleýmettik qorǵaý mınıstrligi eń úlken suranysqa ıe TOP-5 bos jumys oryndarynyń qataryna medbıkeni kirgizedi (1,2 myń bos oryn).