Qazaqstanda 416 shaqyrym temirjol tósemine kúrdeli jóndeý júrgiziledi

NUR-SULTAN. QazAqparat – Bıyl elimizde 400 shaqyrymnan astam temirjol tósemi kúrdeli jóndeýden ótedi, dep habarlaıdy QazAqparat.

«Bıyl 416 shaqyrym magıstral kúrdeli jóndeýmen qamtylady. Tıisti jumystar 6 sáýirde «Dostyq-Aqtoǵaı aralyǵyndaǵy ýchaskede bastaldy. Jospardaǵy 23,8 shaqyrymnyń 3,5 shaqyrymy jóndeýden ótti», - delingen taratylǵan málimette.

13 sáýirden bastap «Qandyaǵash –Saǵyz» ýchaskesinde de jóndeý sharalary iske asyrylýda. Árbir nysanda 80 jumysshy men 30 mehanızator jumyldyrylǵan. Sonymen qatar, jóndeý poıyzdary, krandar jáne ózge de arnaıy tehnıka tartyldy.

«Osy baǵyttaǵy jumystar shtattyq rejımde júrgizilýde. Atap aıtqanda, koronavırýs ınfektsııasymen kúres aıasynda qabyldanǵan barlyq qaýipsizdik sharalary eskerilgen», - delingen «Qazaqstan temir joly» UK» AQ «Magıstraldyq jeli dırektsııasy» málimetindi.