Qazaqstanda 413,4 myń kópbalaly otbasy aı saıynǵy memlekettik járdemaqy alady

NUR-SULTAN. QazAqparat – Qazaqstanda ótken 2020 jyly qosymsha qoldaý maqsatynda zeınetaqy men járdemaqy mólsheri eki ret ındeksteldi, dep habarlaıdy QazAqparat.

Bul týraly QR Eńbek jáne halyqty áleýmettik qorǵaý mınıstrliginiń 2020 jyly atqarǵan jumystarynyń qorytyndy esebinen málim boldy.

Mınıstrliktiń derekterine qaraǵanda, 2020 jyly bazalyq zeınetaqy men memlekettik járdemaqylardyń ósimi 2019 jylmen salystyrǵanda 10% – dy, yntymaqty zeınetaqynyń ósimi 12% - dy qurady.

2020 jylǵy 1 qańtardan bastap kópbalaly jáne tabysy az otbasylardy áleýmettik qoldaýdyń jańa tásilderi engizildi. Búgingi tańda 413,4 myń kópbalaly otbasy aı saıynǵy memlekettik járdemaqy alady, onyń mólsheri otbasynyń tabysyna emes, balalardyń sanyna baılanysty bolyp keledi.

Tabysy az otbasylardyń balalary úshin 2020 jylǵy 1 qańtardan bastap kepildik berilgen áleýmettik toptama engizildi. Áleýmettik kómektiń bul túrine 430 myń balaǵa alǵash ret 17,5 mlrd. teńge qarastyryldy.

Sondaı-aq, 2020 jylǵy 1 qańtardan bastap mindetti áleýmettik saqtandyrý júıesinen tólenetin uzaq merzimdi áleýmettik tólemderdiń mólsheri 2019 jylǵa qaraǵanda orta eseppen 50% - ǵa artty.