Qazaqstanda 4110 UOS ardageri bar (FOTO)

ASTANA. QazAqparat - QR Tuńǵysh Prezıdenti kúni qarsańynda elimizdiń Memlekettik hatshysy Gúlshara Ábdiqalyqova Jeńistiń 70 jyldyǵyna oraı Máskeý men Beıjińde ótken sherýlerge qatysqan soǵys ardagerlerimen kezdesti.

Kezdesý barysynda G.Ábdiqalyqova QR Prezıdenti N.Nazarbaevtyń tapsyrmasy boıynsha búgin Astana, Almaty, Qaraǵandy, Pavlodar, Taldyqorǵan jáne Shymkent qalalarynda Jeńis sherýlerine qatysqan soǵys ardagerlerin marapattaý sharalary saltanatty túrde ótkizilip jatqanyn atap ótti. Sonymen qatar, Memlekettik hatshy Uly Jeńis úshin ardagerlerge sheksiz rızashylyǵyn bildirip, olardyń Otanymyzdyń Táýelsizdigi jolynda jasaǵan óshpes erlikteri men tyldaǵy qajyrly eńbekteri jadymyzda saqtalatyndyǵyn basa aıtty.

«Búgingi kúni Qazaqstanda 4110 soǵys ardagerleri, qatysýshylary jáne múgedekteri bar. Eshkim de esten shyǵarylǵan emes. Sizderdiń beıbitshilik pen kelisim syılaǵandyqtaryńyz úshin sheksiz rızashylyǵymdy bildirgim keledi. Sizderdiń surapyl soǵystaǵy erlikterińiz ben janqııarlyq eńbekterińizdi esten shyǵarmaýǵa tıispiz. Osy sátte paıdala otyryp, sizderdi kele jatqan QR Tuńǵysh Prezıdenti kúnimen quttyqtaımyn. Zor densaýlyq, uzaq ómir tileımin», - dedi G.Ábdiqalyqova.

Memlekettik hatshy «Elbasy atap kórsetkendeı, soǵys ardagerleri men tyl eńbekkerlerine degen qamqoryq memlekettiń mańyzdy mindeti bolyp tabylatynyna» nazar aýdardy. Máselen, aǵymdaǵy jyldyń 1 qarashasyndaǵy jaǵdaıǵa sáıkes, tek qana birjolǵy materıaldyq kómek kórsetýge jáne merekelik is-sharalarǵa qatysý úshin memlekettik bıýdjetten 7,7 mlrd. teńge bólingen.

Kezdesý barysynda ardagerler Ult Kóshbasshysy N.Nazarbaevqa udaıy qamqorlyǵy men yqylasy úshin shynaıy rızashylyqtaryn bildirdi. Olar Elbasynyń júrgizip otyrǵan sarabdal ári syndarly saıasatyn qoldaıtyndyqtaryn atap ótti. Sol saıasattyń arqasynda elimizde beıbitshilik, birlik pen kelisim saltanat quryp otyrǵandyǵyn aıryqsha atady.

Kezdesý sońynda G.Ábdiqalyqova ardagerlerge Elbasy N.Nazarbaevtyń izgi tilekterin jetkizip, «Samuryq-Qazyna» UÁQ» AQ tarapynan bólingen Máskeý jáne Beıjiń qalalarynda ótken sherýge qatysýshy ardagerler úshin arnaıy aqshalaı sertıfıkattardy tabystady.

Aıta keteıik, Máskeý men Beıjińde ótken sherýge elimizdiń ártúrli óńirinen 13 ardager qatysqan bolatyn.