Qazaqstanda 400 myń adamnyń eńbek sharty elektrondy formatqa kóshirildi

ASTANA. QazAqparat - Qazaqstanda eńbek sharttaryn elektrondy túrde tirkeý kórsetkishi ósip keledi, dep xabarlaıdy QazAqparat tilshisi QR Eńbek jáne xalyqty qorǵaý mınıstrliginiń baspasóz qyzmetine silteme jasap.

«Ótken jyly QR Eńbek jáne xalyqty áleýmettik qorǵaý mınıstrligi eńbek sharttaryn elektrondy tirkeý júıesin pılottyq joba túrinde qolǵa alǵan bolatyn. Búginde biryńǵaı júıede jumys berýshiler 400 myńǵa jýyq eńbek shartyn tirkedi. Jumys berýshilerdiń ishinde «Air Astana» AQ birinshi bolyp eńbek sharttaryn elektrondy tirkeýge tolyǵymen kóshti. Negizi, qazirdiń ózinde zań boıynsha kadrlyq qujattamanyń barlyǵyn qaǵaz júzinde júrgizbeı, tolyǵymen elektrondy júıege aýystyrýǵa bolady», - delingen resmı xabarlamada.

QR Eńbek jáne xalyqty áleýmettik qorǵaý vıtse-mınıstri Narıman Muqyshev «Air Astana» kompanııasyna arnaıy baryp, sol jerdegi tsıfrlandyrý sharalarymen tanysyp qaıtty. Qyzmetkerlerdiń sózine qaraǵanda, elektrondy júıeni engizgende birqatar qıyndyqtar bolǵan. Alaıda onyń bári oıdaǵydaı sheshildi. Qazirgi kezde «Air Astana»-da árbir qyzmetkerde tsıfrlyq qoltańba bar. Al eńbek sharttary BPM júıesinde tirkeledi. Kompanııada 5 myńnan astam adam jumys isteıdi.

«Air Astana»-nyń kadrlyq qyzmet salasyndaǵy ınnovatsııalyq sheshimderi maqtaýǵa turarlyq. Bolashaqta tsıfrlyq format keńinen taralady. Sondyqtan, kompanııanyń tájirıbesi jaqsy, ony keńinen taratý qajet. Eńbek jáne xalyqty qorǵaý mınıstrligi ondaı tsıfrlyq bastamalardy tolyǵymen qoldaıdy», - dep atap kórsetti N.Muqyshev.