Qazaqstanda 40 mln gektar jer paıdalanylmaı bos jatyr – Úkimet basshysy

NUR-SULTAN. QazAqparat – Byltyr paıdalanylmaı jatqan 400 myń gektar jer qaıtaryldy, al bıyl 5 mln gektarǵa deıin jer alynady. Bul týraly QR Premer-Mınıstri Álıhan Smaıylov aıtty, dep habarlaıdy QazAqparat tilshisi.

«Biz ǵaryshtyq monıtorıng tásili arqyly jerdiń paıdalanylýyn baqylaımyz. Bul norma byltyr otandyq zańnamaǵa engizilgen. Osy ǵaryshtyq monıtorıng nátıjesinde 40 mln gektar jer paıdalanbaı jatyr degen aqparat aldyq. Onyń 95 paıyzy – jaıylym jerleri. Jaıylym jerdiń tapshylyǵy bar ekeni barshamyzǵa málim. Biraq olardy qaıtarý máselesi bir kúnde sheshilmeıdi. Nege deseńiz, Konstıtýtsııamyzda jekemenshik quqyqtar qorǵalǵan. Sondyqtan sol paıdalanbaıtyn jerlerdi qaıtarý máselesi sot tártibimen sheshiledi», - dedi Álıhan Smaıylov Ulttyq arnada «Jańa Qazaqstan» baǵdarlamasynda.

Onyń aıtýynsha, bul másele jóninde arnaıy komıssııa quryldy jáne bıyl bul jumystar jandanady.

«Byltyr paıdalanylmaı jatqan jerlerdiń 400 myń gektary qaıtaryldy. Bıyl muny 5 mln gektarǵa deıin jetkizemiz. ıAǵnı bıyl qaıtarylatyn jer kólemi 12 esege ulǵaıady jáne ol jerlerdi naqty paıdalanatyn, aýyl sharýashylyq ónimin shyǵaratyn otandyq kásipkerlerge berý kerek. Sondyqtan bul óte mańyzdy suraq», - dedi Premer-Mınıstr.