Qazaqstanda 4 myńǵa jýyq bala jyl saıyn qylmys qurbany bolady

ASTANA. QazAqparat - QR Bilim jáne ǵylym mınıstrligi «Daǵdarys ortalyqtar odaǵy» ZTB-men birlesip Qazaqstan Táýelsizdiginiń 25 jyldyǵy qarsańynda «Zorlyq-zombylyqsyz balalyq shaq» respýblıkalyq aqparattyq naýqanynyń bastalýyn jarııalady, dep habarlaıdy QazAqparat.

«QR Bas prokýratýrasynyń málimeti boıynsha jyl saıyn elimizde balalarǵa qatysty 4 myńǵa jýyq qylmys, onyń ishinde bala óltirý, zorlyq-zombylyq, qatygez ustaý jáne basqa da qylmystar jasalady.

Jalpy, sońǵy 3 jylda kámeletke tolmaǵandarǵa qatysty qylmystardyń deńgeıi 51 paıyzǵa kemigendigi baıqalady (2016 jyldyń 6 aıynda 44,6 paıyzǵa kemidi (2795-ten 1548-ge deıin). Alaıda balalarǵa qatysty zorlyq-zombylyq problemasy ózekti bolyp otyr jáne ony sheshý úshin memleket pen qoǵam tarapynan birshama shara qabyldaýdy talap etiledi»,-delingen QR BǴM Balalardyń quqyqtaryn qorǵaý komıteti málimetinde.

Atap aıtqanda, aqparattyq naýqan aıasynda kámeletke tolmaǵandarǵa qatysty zorlyq-zombylyq, qatygez ustaý máseleleri boıynsha halyqty aqparattandyrý, «dóńgelek ústel» jáne konferentsııalar, kórmeler, balalar sýretteri men shyǵarmalarynyń baıqaýlaryn, pikirtalastar, sondaı-aq memlekettik jáne úkimettik emes uıymdar ókilderimen kezdesýler ótkizilmek.

Munymen qosa, quqyq qorǵaý organdary, ata-analar qaýymdastyǵynyń ókilderin tarta otyryp «Otbasyda zorlyq-zombylyqqa jol bermeıik», «Túngi qaladaǵy balalar», «Jasóspirim», «Kóshe» sııaqty keń aýqymdy vedomstvoaralyq reıdtik is-sharalar qamtylmaq.

Aqparattyq naýqan 15 - 30 qarasha aralyǵynda, elimizdiń barlyq óńirlerinde uıymdastyrylady.

Naýqannyń maqsaty - qoǵamnyń nazaryn balalarǵa qatysty zorlyq- zombylyq máselelerine aýdarý, qoǵamda balalardy qatygez ustaýǵa tózbeýshilik qatynasty qalyptastyrý, qoǵamnyń osy salada halyqaralyq jáne ulttyq zańnama negizderi týraly habardarlyǵyn arttyrý.