Qazaqstanda 3,8 trln tekshe metr dáleldengen gaz qory bar

<p>ASTANA. KAZINFORM — Ónerkásip jáne qurylys mınıstrligi geologııa komıtetiniń málimetinshe, elimizde gazdyń dáleldengen qory — 3,8 trln tekshe metr. </p>

Onyń ishinde ilespe (erigen) gaz — 2,2 trln tekshe metr, al tabıǵı (erkin) gaz — 1,6 trln tekshe metr. 

Alaıda British Petroleum Qazaqstanda tabıǵı gazdyń dáleldengen qorynyń kólemi 2,3 trln tekshe metr ekenin málimdep otyr. Bul — álemde 15-orynda turǵan kórsetkish. 

Osylaısha Qazaqstanǵa tabıǵı gazdyń búkilálemdik kóleminiń 1,2% tıesili. 

Salystyrsaq, gaz qory boıynsha kóshbasshy elder — Reseı (37,4 trln tekshe metr), Iran (32,1 trln tekshe metr) jáne Qatar (24,7 trln tekshe metr). 

Óz kezeginde Energetıka mınıstrligi qos málimettegi aıtarlyqtaı aıyrmashylyqty túsindirdi. 

Vedomstvo jaqynda gazdyń qoryn British Petroleum sııaqty esepteý ádistemesine kóshirýdi josparlap otyrǵanyn habarlady. 

«Kórsetkishterdiń mundaı sáıkessizdigi Qazaqstannyń gaz qoryndaǵy ilespe munaı gazynyń joǵary úlesinen de, respýblıka jaqyn arada halyqaralyq standarttarǵa kóshýdi josparlap otyrǵan qordy esepteý ádistemesindegi aıyrmashylyqtan da týyndady», — delingen Energetıka mınıstrliginiń habarlamasynda.