Qazaqstanda 376 mlrd teńgege 50 myń kólik shyǵaryldy

NUR-SULTAN. QazAqparat – 2020 jyldyń toǵyz aıynda Qazaqstanda 50 656 avtokólik qurastyryldy. Olardyń arasynda jeńil jáne júk kólikteri, avtobýs tehnıkasy men arnaıy mashınalar da bar. Bul týraly QazAqparat «QazAvtoÓnerkásip» avtokólik salasyndaǵy kásiporyndar odaǵyna silteme jasap habarlaıdy.

Esepti kezeńde Qazaqstanda shyǵarylǵan kólikterdiń jalpy quny 376,4 mlrd teńgege baǵalanyp otyr. Onyń ishinde jeńil avtomobıl qurastyrý 42,4 paıyzǵa ósip, 42 498-ge jetti. Avtobýs tehnıkasyn shyǵarý (1401 kólik) 65,2 paıyzǵa joǵarylady. Sonymen qatar, júk kólikterin qurastyrý (5273 kólik) 2,5 esege ósken.

Al respýblıka turǵyndary jergilikti óndiristen shyqqan kólikterdi satyp alýǵa 337,6 mlrd teńge jumsaǵan. Bul kórsetkish bir jyl burynǵydan 61,8 paıyzǵa artyq.

Esepti kezeńde Qazaqstanda qurastyrylǵan jeńil kólikterdiń arasynda suranysqa ıe brendterdiń bestigine Lada (13404 kólik), Hyundai (11509), Ravon (5414), KIA (4689) jáne Chevrolet (3563 ) endi.

Otandyq kásiporyndar usynatyn markalardyń tiziminde JAC (1268 kólik), UAZ (363) ári Skoda (233) bar ekenin atap ótken jón.