Qazaqstanda 340 mektep dırektorynyń orny bos tur, maman joq – mınıstr

ASTANA. QazAqparat – Bilim berý salasyndaǵy basshylardyń biliktiligin arttyrý úshin «Bilim berý ózgeristeriniń myń kóshbasshysy» baǵdarlamasy ázirlenedi. Bul týraly Oqý-aǵartý mınıstri Ǵanı Beısembaev aıtyp berdi, dep habarlaıdy QazAqparat tilshisi.

«Bilim berý júıesiniń jetistigi men bilim berý protsesiniń barlyq qatysýshylary – muǵalimder, oqýshylar, mektep dırektorlary, ata-analar, ǵylymı ortalyqtar, atqarýshy organdar arasynda kommýnıkatsııanyń durys qurylýyna baılanysty bolyp otyr. Osy oraıda jaýapkershiliktiń durys qurylýy mańyzdy. Atap aıtqanda, synyp ishinde muǵalim bilim sapasyna tolyq jaýapty bolsa, mektep basshysy – mektep deńgeıinde bilim berý sapasyna jáne kollaboratsııaǵa jaýapty. Aýdandyq bilim bólimderi – aýdandyq dırektorlar korpýsynyń sapasyna, óńirlik bilim basqarmalary – óńir deńgeıindegi dırektorlar korpýsynyń sapasy men jalpy basqarýyna jaýapty», - dep atap ótti mınıstr «Qazaqstan halqyna» qory uıymdastyrǵan «Bilimdi urpaq – bilimdi el» konferentsııasynda.

Qazirgi ýaqytta Qazaqstanda bilim basqarýshylarynyń júıeli daıarlaý baǵdarlamasyn qajet etip otyr.

«Bul baǵytta aıta ketetin dúnıe – jalpy basqarýshy, personaldy kóshbasshylyq jáne menedjment daǵdylaryn úırený basshylyq laýazymǵa taǵaıyndalǵan soń júrgiziletinin kórip otyrmyz. Ýaqyt ótken saıyn mektep dırektorlarynyń tapshylyǵy da kórinis taýyp, bilim mekemeleriniń basshylarynyń jalaqysyn arttyrý qajettigi de týyndap otyr. Osyǵan oraı, Prezıdent tapsyrmasymen «Bilim berý ózgeristeriniń myń kóshbasshysy» baǵdarlamasyn ázirleýdemiz. Bul jalpy orta bilim berý júıesin basqarý men kóshbasshylyqtyń zamanaýı quziretterine ıe, bilikti mamandarmen qamtamasyz etedi», - dedi Oqý-aǵartý mınıstri.

Oqý-aǵartý mınıstriniń aıtýynsha, 2023 jyldyń mamyr aıyndaǵy jaǵdaı boıynsha respýblıkada 340 dırektor jetispeýshiligi bar, 144 dırektor zeınet jasyna jaqyndap qaldy.

«Jaıly mektep» jobasy boıynsha salynatyn 401 mektepke de dırektorlar qajet.