Qazaqstanda 303 myń adam psıhıkalyq keselmen esepte tur - dáriger

<p>Adamnyń aqyl-esin buzyp, psıhıkalyq aýytqý meńdeıtin, oı-órisiniń damýyn tejeıtin psıhıkalyq derttiń birneshe túri bar. Sonyń arasynda psıhobelsendi zattardy tutynýshylar kósh bastap tur. Bul týraly Respýblıkalyq psıhıkalyq densaýlyq ǵylymı-praktıkalyq ortalyǵynyń bas dırektorynyń orynbasary Nábı Esimov málim etti, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

Onyń aıtýynsha, ortalyqqa keńes alýǵa kelgen barlyq azamat jaıly aqparat qupııa saqtalady.

Maskúnemdik, nashaqorlyq pen túrli psıhıkalyq dert mazalaǵan turǵyndarǵa ortalyq mamandary medıtsınalyq kómek kórsetip, keńes beredi.

Elimizde psıhobelsendi zattardy tutyný saldarynan psıhıkalyq keselge shaldyqqan 108 myńnan astam naýqas dınamıkalyq baqylaýǵa alynǵan.

Psıhıatrlar olardyń densaýlyǵyn júıeli túrde baqylap, medıtsınalyq, psıhologııalyq kómek beredi.

76 myńǵa jýyq naýqas aqyl-oı kemistigi, 58 myń turǵyn organıkalyq psıhıkalyq buzylystary, 44 myń naýqas shızofrenııa, sandyraqtaý sııaqty dertpen tirkelgen.

«Psıhobelsendi zattardy tutynǵan naýqastardyń júrisinde, psıhıkasynda buzylys paıda bolady. Onyń birneshe túri bar jáne aǵzaǵa zııany óte orasan zor. Polıorgandy patologııa shaqyrýy múmkin, aǵzanyń ýlanýy, eń bastysy naýqas oǵan táýeldi bolyp, qulyna aınalady. Sıntetıkalyq esirtkini kúnde izdeıdi. Satyp alý úshin túrli aıla-amalǵa barady. Sandyraqtaıdy. Túrli eles kórip, ózinen-ózi úrkip, psıhıkalyq aýyr soqqylar alady.Sondyqtan bul — óte qaýipti kesel», - deıdi Nábı Esimov.

Mamannyń sózinshe, esirtkige táýeldi naýqastardyń basym bóligi — 25 jasqa deıingi jastar.

«Psıhıkalyq densaýlyq ortalyǵynda naýqasty baılap, qamap tastaıdy» degen el arasynda jıi aıtylatyn pikir de shyndyqqa janaspaıdy.

Kez kelgen maman emdelýshiden jazbasha kelisim alǵannan keıin suhbat, áńgimelesýdi bastaıdy.

Aıta keteıik, Qazaqstanda qalalyq, oblystyq psıhıkalyq densaýlyq ortalyqtarynda 303 284 adam dınamıkalyq baqylaýda tur.

Onyń 200 myńǵa jýyǵy (195299) psıhıkalyq, 35,6% (107985) narkologııalyq dertke shaldyqqan.