Qazaqstanda 300 myńǵa tarta azamattyń biryńǵaı jıyntyq tólemi 1 mlrd teńgege jaqyndady

NUR-SULTAN. QazAqparat – 2019 jyldyń 1 qańtarynan bastap jınalǵan Qazaqstan azamattarynyń biryńǵaı jıyntyq tóleminiń (BJT) jalpy kólemi 924,1 mln teńgege jetti, dep habarlaıdy QazAqparat.

Eńbek jáne halyqty áleýmettik qorǵaý mınıstrliginiń habarlaýynsha, 2019 jylǵy 1 qańtardan bastap 2020 jylǵy 31 qańtarǵa deıingi kezeńde BJT tóleýshiler sanatyndaǵy beıresmı jumyspen qamtylǵan 297 myń azamat jalpy somasy 924,1 mln teńgege 562,3 myń márte tólem jasaǵan.

«421,5 mln teńgelik somany elordanyń, respýblıkalyq jáne oblystyq mańyzy bar qalanyń turǵyndary 166,9 myń márte tólem jasasa, 502,6 mln teńgelik 395,4 myń tólemdi basqa eldimekenderdiń turǵyndary júzege asyrdy», - dep habarlaıdy mınıstrlikten.

Eske sala keteıik, BJT – bul beıresmı jumyspen qamtylǵan adamdarǵa jeke kásipker retinde tirkeýsiz kásipkerlik qyzmetti júzege asyrýǵa múmkindik beretin rejim. BJT jyldyq jıyntyq tabysy 1 175 AEK (2020 jyly – 3 mln 115 myń teńge) aspaıtyn jeke tulǵalarǵa qyzmet kórsetetin azamattar úshin engizilgen. Ol 4 tólem - jeke tabys salyǵyn, zeınetaqy jarnalaryn, áleýmettik aýdarymdardy, áleýmettik medıtsınalyq saqtandyrý júıesine aýdarymdardy qamtıdy.

Qala men aýyl turǵyndarynyń kiristerindegi aıyrmashylyqty eskere otyryp, qala turǵyndary úshin BJT mólsheri 1 AEK nemese 2 651 teńgeni qurasa, aýyl turǵyndary úshin - 0,5 AEK, ıaǵnı 2020 jyly 1 325,5 teńge shamasynda bolyp otyr.

Biryńǵaı jıyntyq tólemniń úlesi:

- 10 % – jeke tabys salyǵy;

- 20 % - Memlekettik áleýmettik saqtandyrý qoryna áleýmettik aýdarymdar;

- 30 % - Biryńǵaı jınaqtaýshy zeınetaqy qoryna zeınetaqy jarnalary;

- 40 % - mindetti áleýmettik medıtsınalyq saqtandyrý qoryna aýdarymdar.

BJT tóleý azamattarǵa mynadaı múmkindikter beredi:

- mindetti áleýmettik medıtsınalyq saqtandyrý júıesine qatysý jáne MÁMS engizgennen keıin medıtsınalyq mekemeni tańdaý quqyǵymen medıtsınalyq qyzmet alý;

- jınaqtaýshy zeınetaqy júıesine qatysý jáne júıege qatysý ótiline baılanysty bazalyq zeınetaqy tólemin alý. BJT tóleýshiler ózderiniń jınaqtaryn Biryńǵaı jınaqtaýshy zeınetaqy qorynda tolyqtyrý, eńbek ótiline baılanysty joǵary mólsherde bazalyq zeınetaqy alý múmkindigine ıe bolady;

- eńbek etý qabiletinen aıyrylǵan, asyraýshysynan aıyrylǵan, júktilik pen bosaný, bala asyrap alǵan, bala kútimi jaǵdaılarynda áleýmettik tólemder alý.