Qazaqstanda 30 sheteldik farmatsevtıkalyq óndirýshi óz óndirisin jergiliktendiredi - Asqar Mamın

NUR-SULTAN. QazAqparat - QR Premer-Mınıstri Asqar Mamınniń tóraǵalyǵymen ótken Investıtsııalyq ahýaldy jaqsartý jónindegi keńes otyrysynda Qazaqstannyń farmatsevtıkalyq qaýipsizdigin qamtamasyz etý máseleleri qaraldy, dep habarlaıdy QazAqparat Úkimet basshysynyń resmı saıtyna silteme jasap.

Qazaqstanda tirkelgen Kanada elshisi Nıkolıa Brýsso, Ulybrıtanııa elshisi Maıkl Gıfford, AQSh elshisiniń orynbasary Teodor Lıng, ýaqytsha senimdi ókil, Shveıtsarııa elshiligi mıssııasynyń basshysy Stefan Kletzlı, AQSh Úkimetiniń medıtsınalyq zertteýler jáne ázirlemeler jónindegi uıymynyń qyzmetkeri Donald Taýnsend, sondaı-aq Pfizer, Johnson&Johnson, Dr.Reddy’s Laboratories, Microsoft kompanııalarynyń ókilderi QR-da farmatsevtıka ónerkásibin damytý perspektıvalary týraly baıandama jasady. Qazaqstan tarapynan densaýlyq saqtaý birinshi vıtse-mınıstri Marat Shoranov túsinikteme berdi. Sheteldik ókilder Qazaqstannyń pandemııamen kúres jáne farmatsevtıkalyq qaýipsizdikti qamtamasyz etý boıynsha qabyldap jatqan sharalaryna joǵary baǵa berdi, sondaı-aq QR densaýlyq saqtaý júıesin jáne dárilik preparattar men medıtsınalyq jabdyqtardy jetkizý tizbegin odan ári jetildirý boıynsha birqatar usynymdar aıtty.

«Qazirgi pandemııaǵa jáne bolashaq epıdemıologııalyq syn-tegeýrinderge qarsy kúreste el áleýetin odan ári arttyrý maqsatynda Farmatsevtıkalyq jáne medıtsınalyq ónerkásipti damytýdyń 2020-2025 jyldarǵa arnalǵan keshendi jospary qabyldandy», — dedi A. Mamın. Qujat 2025 jylǵa qaraı otandyq farmatsevtıkalyq preparattar óndirisin 92-den 230 mlrd teńgege deıin 2,5 esege arttyrýdy kózdeıdi. Otandyq farmatsevtıkalyq ónimniń ishki naryqtaǵy úlesi zattaı kóriniste 50%-ǵa deıin artady. Jospardy iske asyrý aıasynda bıznestiń klınıkalyq jáne klınıkaǵa deıingi synaqtar júrgizýge jumsalǵan shyǵyndaryn óteý, negizgi taýar pozıtsııalaryn, áleýetti taýashalardy, sondaı-aq sheteldik ınvestorlar úshin ınvestıtsııalyq usynystardy aıqyndaý sekildi sharalar qabyldanady. Naqty patsıentke deıin dári-dármekter logıstıkasynyń barlyq kezeńderinde dárilik zattar men medıtsınalyq buıymdardy mindetti tańbalaý men olardyń qadaǵalanýyn kezeń-kezeńimen engizý kózdelgen. «Investıtsııalardy tartý – QR farmatsevtıkalyq ónerkásibin damytý boıynsha alǵa qoıylǵan maqsattarǵa qol jetkizýdiń negizgi quraly. Qazaqstan aýmaǵynda farmatsevtıkalyq ónim óndirisin jergiliktendirýdi qamtamasyz ete otyryp, 30 sheteldik kompanııany tartý boıynsha jumys júrgizilýde», - dedi A. Mamın.