Qazaqstanda 3 jylda jemqorlyq úshin 2,5 myńnan astam adam sottaldy

ASTANA. QazAqparat - Qazaqstanda sybaılas jemqorlyqtyń aldyn alýǵa baǵyttalǵan kúres jalǵasa bermek. Bul jaıly Qazaqstan Respýblıkasynyń Prezıdenti N. Nazarbaevtyń búgin, 2018 jylǵy 10 qańtarda jarııalanǵan «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» atty Qazaqstan halqyna Joldaýynda aıtyldy.

«Sońǵy 3 jylda ǵana joǵary laýazymdy sheneýnikter men memlekettik kompanııalardyń basshylaryn qosa alǵanda, jemqorlyq úshin 2,5 myńnan astam adam sottaldy. Osy ýaqyt ishinde olardyń 17 mıllıard teńge kóleminde keltirgen zalaly óteldi», - delingen jyl saıynǵy Joldaýda.

Memleket basshysynyń aıtýynsha, jemqorlyqtyń aldyn alýǵa baǵyttalǵan kúreste memlekettik organdardaǵy protsesterdi, sonyń ishinde olardyń halyqpen jáne bıznespen qarym-qatynasyn tsıfrlandyrýdyń mańyzy zor. Atap aıtqanda, azamattar óz ótinishteriniń qalaı qarastyrylyp jatqanyn kórip, der kezinde sapaly jaýap alýǵa tıis.

Sot jáne quqyq qorǵaý júıelerin ınstıtýtsıonaldy turǵydan ózgertý júzege asyrylýda. Zańnamaǵa qylmystyq protsestegi azamattardyń quqyqtaryn qorǵaý isin kúsheıtýdi, onyń ásire qatańdyǵyn báseńdetýdi kózdeıtin normalar engizildi.

Advokattardyń quqyqtary men sotqa deıingi satydaǵy sot baqylaýynyń aıasy keńeıdi. Quqyq qorǵaý organdarynyń ókilettigi men jaýapkershilik shegi aıqyndaldy.

«Azamattardyń konstıtýtsııalyq quqyqtaryna kepildikti nyǵaıtý, quqyq ústemdigin qamtamasyz etý, quqyq qorǵaý qyzmetin izgilendirý jumystaryn jalǵastyrý qajet», - delingen Joldaýda.

Sondaı-aq, Elbasy qoǵamdyq tártipti saqtaý jáne qaýipsizdikti qamtamasyz etý salasynda kóshelerde jáne adam kóp jınalatyn qoǵamdyq oryndarda beınebaqylaý júrgizetin, azamattardy anyqtaıtyn jáne jol qozǵalysyn qadaǵalaıtyn ıntellektýaldy júıelerdi belsendi túrde engizýdi tapsyrdy.