Qazaqstanda 2,8 mln gektar jer shegirtkege qarsy óńdeldi

<p>ASTANA. KAZINFORM — Qazaqstanda 2,8 mln gektar aýmaqta shegirtkege qarsy óńdeý boıynsha qorǵaý is-sharalary aıaqtaldy, bul — boljanǵan kólemniń 110 paıyzy. Bul jaıynda Úkimettiń baspasóz qyzmeti habarlady. </p>

Barlyǵy 15,8 mln gektar zertteldi, bul — jospardyń 92,4 paıyzy.

13 oblysta — Abaı, Almaty, Atyraý, Shyǵys Qazaqstan, Jambyl, Jetisý oblysy, Batys Qazaqstan, Qaraǵandy, Qyzylorda, Pavlodar, Soltústik Qazaqstan, Ulytaý jáne Túrkistanda jumys tolyǵymen aıaqtaldy.

Aqmola, Aqtóbe jáne Qostanaı oblystarynda ıtalııalyq shegirtke túráne qarsy óńdeý jumystary jalǵasýda.

Vıtse-premer Serik Jumanǵarınniń tóraǵalyǵymen ótken shegirtkeniń taralýyna qarsy is-qımyl jónindegi ortalyq shtabtyń kezekti otyrysynda zııankestermen kúres jónindegi jaǵdaı qaraldy.

Aýyl sharýashylyǵy vıtse-mınıstri Ermek Kenjehanuly shekara mańyndaǵy aýmaqtarǵa erekshe kóńil bólinetinin atap ótti.

«18-20 shildede Orynbor oblysynan Aqtóbe oblysynyń Áıteke bı aýdanyna ıtalııalyq prýs ushyp kelgeni tirkeldi. Biz jedel túrde óńdeý júrgizdik, qazir shekara mańyndaǵy aýmaqty birlesip zertteý úshin Reseı tarapymen kelissózder júrgizip jatyrmyz», — dep málimdedi ol.

Shegirtkege qarsy kúres júrgizý úshin Aqtóbe oblysyna 136 myń gektar aýmaqty óńdeýge arnalǵan preparattardyń rezervtik kólemi usynyldy.

400 myń gektarǵa dári-dármek satyp alyndy, onyń jartysy Qostanaı oblysyna berildi.

Aqtóbe oblysyna sapary kezinde vıtse-premer Serik Jumanǵarınge keıbir fermerlik sharýashylyqtar egistigin qorǵaý úshin Reseı aýmaǵynyń bir bóligin 100 metr tereńdikte óńdegeni týraly habarlandy.

Osy aptada vıtse-premer Reseı Federatsııasy Úkimeti tóraǵasynyń orynbasarymen jerdi birlesip, jedel óńdeý máselesin talqylaıdy.

Aýyl sharýashylyǵy mınıstrligi Aqtóbe, Aqmola jáne Qostanaı oblystarynyń ákimdikterimen birlesip shegirtkeniń taralý oshaqtaryn anyqtaǵan kezde jedel sharalar qabyldaýdy jalǵastyrady.