Qazaqstanda 27 kompanııa jumysshylarǵa jalaqy bermeı otyr

ASTANA. QazAqparat - Qazaqstandaǵy kompanııalardyń jalaqy qaryzy 440 mıllıon teńgeni qurady. Bul týraly Astanada ótken baspasóz máslıhatynda QR Eńbek jáne halyqty áleýmettik qorǵaý mınıstrligi eńbek, áleýmettik qorǵaý jáne kóshi-qon komıteti tóraǵasynyń orynbasary Tólegen Ospanqulov málim etti, dep habarlaıdy QazAqparat tilshisi.

«Jumysshylardyń quqyǵyn qorǵaý ózekti máselesi bar. Onyń eńbek qatynastaryna baılanysty ekenin barlyqtaryńyz bilesizder. Ol - jumys berýshi men jumysshynyń arasyndaǵy qarym-qatynas, eńbek shartyn jasasý, jumys berýshilerdiń jumysshylarǵa jalaqyny ýaqtyly tóleý máselesi. Bul salada da bizdiń mınıstrlikten basqa ortalyq memlekettik organdarmen birqatar jumystar atqaryldy», - deıdi komıtet tóraǵasynyń orynbasary. 

Tólegen Ospanqulovtyń keltirgen deregine súıensek, 2013 jyly respýblıka boıynsha jalaqy qaryzy 1,1 mlrd teńgeni quraıtyn bolsa, 2018 jyldyń 12 aqpandaǵy jaǵdaıy boıynsha ol soma 440 mıllıon teńgeni kórsetken. 

 

«Bul rette negizgi jumys - ortalyq memlekettik organdar birlese atsalysa atqarǵan qyzmettiń nátıjesi dep oılaımyn. 2013 jyldan bastap bizde respýblıka boıynsha Bas prokýratýra, Ádilet mınıstrligi, Qarjy mınıstrligi men Eńbek jáne halyqty áleýmettik qorǵaý mınıstrligi «jumysshylardyń quqyǵyn qorǵaý jáne jalaqysyn ýaqtyly tóleý boıynsha» 4 jaqty buıryq qabyldaǵan», - dedi ol.

Mınıstrlik ókiliniń aıtýyna qaraǵanda, jalpy somasy 440 mıllıon teńge jalaqy qaryzyn óteı almaı otyrǵan 27 kásiporyn bar.