Qazaqstanda 2025 jyly ǵalymdardyń sany 1,5 esege kóbeıedi

NUR-SULTAN. QazAqparat – Elimizde ǵylymmen aınalysatyn mamandardyń sany artpaq. Naqty aıtqanda, 2025 jyly otandyq ǵalymdardyń sanyn 32 myńǵa jetkizý josparlanyp otyr. Bul týraly QR Bilim jáne ǵylym mınıstrligi Ǵylym komıtetiniń tóraǵasy Janna Qurmanǵalıeva málim etti, dep habarlaıdy QazAqparat tilshisi.

«Bizdegi kúrdeli máselelerdiń biri - ǵalymdar sanynyń kúrt azaıýy. Qazirgi tańda elimizde ǵylym salasynda eńbek etýshilerdiń sany 22 myńnan sál ǵana asady. Osy oraıda Ulttyq joba aıasynda 2025 jyly elimizdegi ǵalymdar sanyn kóbeıtýdi ıaǵnı keminde 34 myńǵa jetkizýdi kózdep otyrmyz. Aldymen ǵylym salasyn qarjylandyrýǵa qatysty máseleni rettep alý kerek. Bul máseleni sońǵy 2 jylda erekshe nazar alyp kelemiz. Sonyń nátıjesinde 2020-2021 jyly ǵylymǵa bólinetin qarjy kólemi 2 esege artty. Jáne otandyq ǵylym salasyna bólinetin qarjyǵa tek bizdiń mınıstrlik qana emes, odan bólek 9 ortalyq memlekettik organ jaýapty», - dedi Janna Qurmanǵalıeva OKQ-de ótken baspasóz máslıhatynda.

Komıtet basshysynyń sózine sensek, bıyl ǵylym salasyna 83 mlrd teńgeden astam qarjy bólindi.

«Sol qarjyǵa bizdiń komıtet ǵalymdarǵa arnalǵan 5 granttyq jáne 2 baǵdarlamalyq baıqaý jarııalady. Qazirgi tańda elimizde 1164 ǵylymı joba qarjylandyrylyp jatyr. Odan bólek, Memleket basshysynyń tapsyrmasyna sáıkes 2 ret jas ǵalymdarǵa arnalǵan konkýrs uıymdastyryldy. Sonyń nátıjesinde 315 ǵylymı joba iske asyryldy. Búginde elimizde 2 myńnan astam jas mamandar ǵylymmen aınalysyp jatyr», - deıdi ol.

Buǵan deıin J.Qurmanǵalıeva otandyq ǵalymdar ortasha qansha jalaqy alatynyn aıtty.

Odan bólek, ǵylym komıteti tóraǵasynyń sózinshe, elimizde ǵylymı mekemelerdi irikteý men qarjylandyrý erejesi ázirlenip jatyr.