Qazaqstanda 2025 jylǵy kóktemgi egis jumystaryn qarjylandyrý bastaldy

<p>ASTANA. KAZINFORM — Memleket basshysy jaqynda ótken agroforýmda agroónerkásiptik keshen ekonomıkalyq ósimniń negizgi kúshteriniń biri sanalatynyn atap ótti. Úkimet AÓK damytý jónindegi mindetterge qol jetkizý maqsatynda keshendi sharalar qabyldaýda.</p>

Qazaqstanda Premer-mınıstrdiń tapsyrmasy boıynsha fermerlerdiń ótinish-tilekterin eskere otyryp, osy jyldyń 29 qarashasynan bastap 2025 jylǵy kóktemgi egis jáne egin jınaý jumystaryn júrgizýdi qarjylandyrý bastaldy.

— Prezıdenttiń tapsyrmasyn oryndaý sheńberinde 2025 jylǵy kóktemgi egis jáne egin jınaý jumystaryna 700 mlrd teńgege deıin baǵyttalady, onyń 560 mlrd teńgesi kapıtaldyń naryqtyq kózderinen tartylatyn bolady. Búginnen bastap «Agrarlyq nesıe korporatsııasy» AQ jyldyq 5% deńgeıinde jeńildikti syıaqy mólsherlemesimen «Keń dala 2» baǵdarlamasy boıynsha qarjylandyrý tetigi iske qosyldy, — delingen habarlamada.

684 aýyl sharýashylyǵy taýaryn óndirýshilerden shamamen 82 mlrd teńge somaǵa ótinimderdiń jalpy pýly qalyptastyryldy, onyń ishinde 176 ótinim jumysqa qabyldandy.

Taǵy 509 ótinish boıynsha 59,9 mlrd teńgege qujattar jınalady.

Ótinimderdiń basym kópshiligi Soltústik Qazaqstan jáne Qostanaı oblystarynyń fermerlerinen kelip tústi.

Qarjylandyrý alǵash ret kóktemgi egis jáne egin jınaý jumystaryn júrgizýden buryn bastalǵanyn atap ótý mańyzdy, bul fermerlerge tuqymdy, tyńaıtqyshty aldyn-ala satyp alýǵa, tehnıkany daıyndaýǵa jáne barlyq qajetti jumysty sapaly júrgizýge múmkindik beredi. Úkimet qabyldaǵan sharalardyń arqasynda sharýalar ózderine barynsha qolaıly jaǵdaılar boıynsha jedel qarjylyq qoldaý alady. Budan basqa, qaryzdardy resimdeý úshin de, olardy keıinnen óteý úshin de júginýge bolatyn qarjy ınstıtýttarynyń sany ulǵaıdy. Qarajatqa ekinshi deńgeıli bankter, nesıelik seriktestikter, áleýmettik-kásipkerlik korporatsııalar jáne Agrarlyq nesıe korporatsııasy arqyly qol jetkizýge bolady. Sondaı-aq kásipkerler jıi kóteretin kepilmen qamtamasyz etýdiń jetispeýshiligi máselelerin sheshý úshin «Keń dala 2» baǵdarlamasy boıynsha qaryz somasynyń 85%-yn «Damý» kásipkerlikti damytý qory kepildik beredi.

Konsýltatsııa alý jáne ótinimder berý úshin «Agrarlyq nesıe korporatsııasy» AQ-nyń jaqyn mańdaǵy óńirlik fılıaldaryna júginý qajet.  Qosymsha aqparatty Agrocredit.kz saıtynan alýǵa bolady jáne Kcell, Activ, Beeline abonentteri úshin 5353 Call center nómiri; Tele 2, Altel úshin 8 701 006 19 91 telefon nómiri jumys isteıdi.

Buǵan deıin Senat EAEO-da aýyl sharýashylyǵy ónimderiniń saýdasyna qatysty zańdy maquldady.